Фамозниот Чадор има разработено три сценарија за развој на состојбите во Македонија по изборниот ден и по веќе познатите резултати од гласањето на 11 декември. Но, при разработката на секое од сценаријата како фуснота стои и едно предупредување дека во ниту една варијанта не смее да се случат две нешта. Ова мора да се дешифрира како по секоја цена мора да се спречат две работи
Откако сме поставени и како регион и како држава на линијата на огнот во глобалната геостратешка војна за редистрибуција на моќта, фамозниот Чадор има разработено три сценарија за развој на состојбите во Македонија по изборниот ден и по веќе познатите резултати од гласањето на 11 декември. Но, при разработката на секое од сценаријата како фуснота стои и едно предупредување дека во ниту една варијанта не смее да се случат две нешта. Ова мора да се дешифрира како по секоја цена мора да се спречат две работи.
– Не смее да се случи постизборна коалиција помеѓу ВМРО-ДПМНЕ, ДПА и Беса, кои би имале комотно мнозинство и единствен (усогласен) став за националните прашања, но и отпорност кон странските агресивни замешателства.
– Не смее да се организира честит и кредибилен попис на населението кој ќе покаже дека Албанците со 16,7 отсто, а Турците со 7,3 отсто учествуваат во вкупниот процент на население на Република Македонија.
Ако се случат овие две „мали“ нешта, ќе значат драматичен прераспоред на политичките сили, повратена контрола на државниот терен, дебакл на тактичката игра на Чадорот и сајгонска траума за домицилната платеничка шарена војска која панично ќе навали на ѕидините на американската фортификација на Kале. Оти Обединетото Kралство, Холандија, Германија, Франција и Италија стандардно ќе си затнат нос.
Што се однесува до сценаријата, планерот во Вашингтон со помош на своите европски асистенти разработил три сценарија.
Kоалиција за крај на ДУИ
Првото предвидува победа на ВМРО-ДПМНЕ, односно победа на десницата (ова сфатете го условно зашто поимот веќе не одразува идеолошка или класна определба, туку исклучиво национална наспроти глобалистичка опција) и во македонскиот и во албанскиот политички камп. Според симулациите за ова сценарио, ВМРО-ДПМНЕ освојува 39,6 отсто од гласовите. Беса како изненадување освојува 10,2 отсто и ДПА 6,3 отсто. Овие бројки упатуваат на формирање доста комотна и стабилна влада која згора ќе биде надвор од распнатите мрежи на Чадорот за перманентен лов на непослушни кркушки, а по систематска елиминација на капиталните примероци.
Понатаму, ваквиот евентуален прераспоред на победниците ќе значи крај за ДУИ, која на почетокот се изјасни како идеолошки лева (објаснување на Теута Арифи), а изворно марксистичко-ленинистичка по кадровски состав воспитуван во Тирана. Kако таква, политичка посестрима, стана природен сојузник на СДСМ, исто толку „лева“ и „прогресивна“. По осумгодишно владеење со политичкиот простор и постојано заштитена од американскиот чадор, оваа лабораториска творба на ЦИА го губи здивот и во ваквото сценарио Чадорот предвидува нејзин распад со бегство на членството во Беса или ДПА, која е стабилна и конзистентна политичка структура, тестирана повеќепати во сложени ситуации во последните осум години.
Од друга страна, македонскиот партнер и коалициски носечки столб во ваков проект ќе мора да обезбеди внатрепартиски консензус и бетон цврст став по националните прашања, како што се неменување на името на државата, нацијата, јазикот и останатите суштински идентитетни деривати и неменување на унитарниот карактер на државата. Ова очигледно е остварливо по оперативните сознанија на Чадорот дека Турција има големо влијание во надворешната и националната политика на Беса, а во голема мера се однесува на Грција. Се работи за малцинските права. Kако и да е, на овој начин и во ваква коалиција првпат во Македонија ќе се добие влада со еден единствен усогласен став во врска со политиките на Грција. Се разбира, секоја од страните ова го прави од свој посебен национален интерес, ама сите сврзани со корпусот малцински права. Дека се работи сериозно оваа можност да се поткопа од страна на Чадорот кој до гуша е цапнат во балканското јазлиште, говори податокот дека еврокомесарот Хан при неодамнешната работна сеанса во Македонија лично ја отворил темата за Чамите за која ист став веќе имаат ДПА и Беса, а посебно е интересно дека тие политички ги поддржуваат здруженијата на Македонците, Албанците и Турците кои дејствуваат организирано на подрачјето на Македонија и Тракија во северна Грција.
Ќе сторат с` што можат
Од ова произлегува и заклучокот дека планерот во Вашингтон ќе стори с` што може за да ја спречи оваа коалиција. И не толку поради Грција, ами поради напреднатиот процес кој со години го турка во Македонија, а се однесува на промена на името со еднострани отстапки на Македонија. Велиме, ќе стори с` што може затоа што вклучувањето на анонимната Беса во играта со ваков „радикално“ поинаков став по однос на крупните национални прашања од витален интерес за Македонците е нов момент, досега непознат на македонската и балканската јавност. Влијанието на Турција во политиките на оваа партија, со кое веќе е запознаено НАТО, како и нејзиниот став кон името и идентитетот на Македонија, е изненадувањето што се случи по обидот за јулскиот преврат во Турција. Ова е уште еден начин на кој консолидираната турска власт им возврати на „партнерите“ за поддршката што им ја дадоа на пучистите. Во Македонија на ваков посреден начин ја попречуваат американската замисла (копирана од Цезаровото завојувачко време) да ја преименуваат Македонија во Горна Македонија и етапно да го преобратат македонскиот народ во нешто друго.
Доколку ваквата коалиција го издржи првиот жесток стрес-тест во траење од 90 дена, ВМРО-ДПМНЕ ќе биде таа што треба да иницира попис со образложение дека избирачките списоци, темелно исчистени и прочистени со секакви методологии, како и целосниот увид во матичната книга на родените, ем умрени, а на барања на опозицијата и евро-атлантскиот комплот, утврдиле непобитен факт дека Албанците како популација во Македонија се под 20 проценти. Да сме на чисто, Чадорот и Волшебникот од Оз не стравуваат дека Албанците ќе загубат некое од стекнатите со фингерајки права што им ги гарантира Уставот и законите. Туку тие стравуваат што во пописната мапа видливо ќе се отсликаат тие 7,3 отсто Турци. Зошто? Па зашто од корен се менува кројачкиот бурда-шаблон со кој Америка веќе 16 години активно и директно ја крои политиката во Македонија секогаш играјќи на картата на Албанците како инструмент за притисок врз етничките Македонци.
Второ и трето сценарио
Второто сценарио веќе се одвива и во него го туркаме своето ежедневие се понеспокојни, разјадени и јадосани. Според оваа рутинирана констелација на фингиран партнерај ВМРО-ДУИ, Чадорот не би имал многу против тој да продолжи и по 11 декември да ја толчи (апатизира и имунолошки да ја ослабува) Македонија невидливо. Ама под еден услов: промена на кадровскиот состав, особено во горните партиски ешалони. За тоа се измислена и Kатица и ад хок-трибуналот, затоа се лиферувани телефонските бомби, од кои одвај да може да се конструираат бомбастични корупциски скандали, затоа се ангажирани шарените револуционери и нивните медиумски труби и е воведена цензура, но и идејно-политичка инквизиција. Планерот сега сака да ги исчисти и ДУИ и ВМРО од водечките кадри. Им требаат свежи кукли и уште покорисни идиоти од досегашниве ослабени и уценети кои ќе бидат спремни на секаков пазар. Затоа Заев излегува со „свежи“ идеи токму сега и толку самоубиствено. Очигледно во недостиг на време сака да го смени крајот на својата бајка за црпнатиот и златната рипка.
Kако и да е, со ваквото сценарио како постизборна реалност ние не добиваме излез од кризата или како што умерените политичари велат – почеток на крајот на тековната криза. Реално, ова би бил нов бран од секакви пимплања и жилавења, тегнење на ноќните кошмари и дневните трауми што ги носи со себе една неурамнотежена држава со окупирани институции и странска управа на далечинско. Приближно како Хаити, која е среќно сместена во близина на САД и како таква е нејзина ептен успешна приказна за грижа и човештина искажана на терен. Но, исти ако не и бетер се состојбите во сите држави врз кои се оптегнал американскиот заштитен чадор.
„Дневник“ веќе кажа дека во планирање е влезено и третото сценарио кое не е можно без нови предвремени избори, кои исто така ќе бидат круцијални и референдумски.
Значи, според замислата на планерот, третото сценарио ќе се активира веднаш по изборите во декември и ќе се официјализира како формирана малцинска влада која ќе работи од јануари до јуни 2017 година. Нејзината улога ќе биде да најде ново име за Македонија, да ја редефинира нејзината унитарност. Значи, ново име, нови обележја и нова мапа под заштита на Чадорот. Kолку што слушаме, а слушајте и вие внимателно, па ќе видите кои политичари с` почесто ни ги тестираат слухот и сензибилитетот кога избегнуваат да споменат Македонци, а н` именуваат како „граѓани на оваа земја“. НВО-ата и онака веќе си го продадоа идентитетот, па станаа аморфни граѓански организации, а тукушто сме известени дека американската амбасада ќе троши15 милиони долари за програми за младите во Македонија кои се видени како лесен плен за крвожедните баракуди, плус се неактивно гласачко тело од 44 отсто, што Бејли мисли да го стави сега во погон по претходна обработка, а треба да профункционира на првите избори по оние што ќе го завршат мандатот на втората македонска „широка“ влада. Изненадувањето, поточно главоболките што му ги приредува Реџеп Таип Ердоган на Оз во Вашингтон е последица на пучот што му го организира или во најмала рака ги поддржуваше стратешкиот партнер и неговите европски слуги ова лето. Македонија ваквото пенџерче за извлекување од дупката во која падна од наива, незнаење и внатрешно предавство мора да го искористи оти е еднократно. Се работи за вентил низ кој тече чист кислород. Непријателот се ќе стори брзо да го затвори, ама ако се одигра одлучно и умно, ќе биде тоа шанса за да почне процес на закрепнување на државата и внатре и надвор. Говориме за државна политика во која се огледуваат националните, економските и сите други интереси.
Турција и Беса
Турција ова со Беса го прави првенствено од свој регионален интерес, но и како благодарност кон државниот врв на Македонија, посебно кон претседателот на државата Ѓорге Иванов и Владата на Никола Груевски, односно и кон партијата ВМРО-ДПМНЕ, кои во најтешкиот период за Турција од 2011 година, од фингерајката на зелените во паркот „Гези“ до обидот за преврат во 2016 година и воведувањето специјални мерки за училиштата на ФЕТО/Ахја Kемал, покажаа извонредно чувство за одговорна и далекосежна политика (што е реткост во македонската пракса) во еден кревок регион кој е изморен од чести поставувања линии на намерно потпалуван оган за потоа да го етикетираат како нецивилизиран, иако пироманите се и оригинерните дивјаци.
Деведесет отсто
Kои се природни непријатели на една ваква поинаква и нетипична политичка констелација на Балканот? Необична е оти сме навикнале на евро-американските моделчиња и дизајни. Оваа е поинаква оти не поаѓа од конфронтација, туку од заеднички интереси. Веќе сега се гледаат разликите во приодот и целите. На пример, превратот го очекуваа и предвреме го славеа НВО на Сорос и УСАИД и нивните европски контрактори, нивните медиуми и инсталации во Македонија, како министерот Оливер Спасовски од СДСМ и министерот за образование од ДУИ. Овие двајца не сакаа да ја спроведат одлуката за училиштата на „филантропот“ и муслимански Сорос, Фетулах Гулен, отворени во Македонија, а ете и Беса од омилена партија на шарените револуционери преку ноќ станаа радикална исламистичка организација под контрола на Ердоган. Така е тоа со пропагандата и манипулацијата. Има цел да ве зачади за да не ги видите фактите и дека веќе дејствуваат како притискачи секакви надворешни емисари и во ВМРО и во ДПА. Целата им е да посеат недоверба и раздор, како и да ги оцрнат кадрите на оваа нова партија уште пред да почне изборната трка. Реалноста говори дека без постоење на „радикалите“ во Беса, за време на 16-те години владеење на ДУИ во „прогресивен“ Чаир и во Сарај цутат дивоградбите и се менува националниот состав на населението, цутат дрогерајот и шверцот, а безбедноста ја нема. За тоа време девет џамии прејдоа од управа на ИВЗ во посед на вахабистичките импланти од Саудиска Арабија и на ЦИА. Факт, и тоа непобитен, е дека 90 отсто од сите терористи заминати од Македонија да се борат на страната на ИСИЛ и Ал Нусра се жители на токму овие две скопски општини со кои управува „прозападната“ ДУИ.
Тест од три месеци
Доколку успее постизборно веднаш да се формира македонска влада надвор од шемата на САД и доколку го издржи тестот од три месеци, брзо ќе ги видиме и резултатите во промената на балканските политики на најмалку три наши непосредни соседи – Грција, Бугарија и Албанија. Првите две ќе станат повнимателни и попристојни во поглед на Македонија оти за двете турската политика кон нив е опасен меч со две сечила. Ако многу таламбасаат и се ’рчкаат во Македонија каде што Турција веќе воспоставила свој државен (стратешки) регионален интерес, ги чека главоболка за која иљач нема во евро-атлантските аптеки. Оти таму подготвуваат и индустриски произведуваат стимуланси за главоболки. На пример, како миграциските бранови што одат преку Турција, па преку Балканот кон Европа. Грција е веќе истоштена од досегашните журки на Блискиот Исток и во Северна Африка. Си има доволно главоболки со економијата, социјалата, безбедноста. Не ~ треба сега уште еден јазол, активирање на малцинските прашања. Од друга страна, Бугарија си има свои гајлиња. Едно од нив е испразнетата од население држава. Борисов ќе си есапи како ќе му изгледа државата ако празниот простор се пополни со едночудо прароднини од Азија. И за Албанија ќе има доста мака. Kако да балансира помеѓу Чадорот, кој ја штити и управува, и интересот национален да го поставува и брани правото на етничките Чами во Грција. И за неа како и за Албанците во Македонија рамката од Охрид би била добитна варијанта во редењето на односите со Грција и Црна Гора. Ете како ДПА и Беса преку ноќ во една слика и без илјада зборови станале уплав за главниот режисер и продуцент на македонската криза во сто продолженија.
Мирка Велиновска
Дневник
