Уставниот суд денеска се произнесе дека Собранието има право да одлучи кому ќе даде амнестија за настаните од 27 април. Мнозинството уставни судии се на став дека амнестија е исклучива надлежност на Собранието, кому и за какви дела ќе одреди.
Со тоа судот ја одби иницијативата на поранешниот директор на Бирото за јавна безбедност Митко Чавков за оценување на уставноста на членот 1 и 2 од Законот за амнестија.
Чавков се жалеше на селективноста бидејќи беа опфатени 15 од вкупно 33 обвинети лица и со тоа ги крши основните слободи и права на човекот загарантирани со Устав.
Судиите се повикоа на амнестијата на Собранието за дел од затворениците поради лошите услови во затворите дадена пред неколку месеци. И тогаш имаше селективност, односно не беа опфатени затворениците осудени за тешки дела, доживотен затвор, изборни нерегуларности, иако и за нив условите во затворот биле тешки.
Сепак судиите сметаат дека ова не смее да стане пракса и амнестијата да стане честа појава, односно да води сметка за еден ист настан да ги амнестира или сите опфатени или никој.