Во ОИК Гостивар до истекот на рокот, доставени се четири кандидатури за градоначалник и десет листи. Кандидатури за градоначалници поднесоа политичките партии: Движење Беса, ДУИ, ДПА и коалициите на Алијанса и Алтернатива, Најдоброто за мојата општина (на СДСМ).
Листи со имиња за членови на општинскиот совет со 31 место, доставени се од вкупно десет политички субјекти (ДПА, ДУИ, Алијанса-Алтернатива, Беса, ВМРО – ДПМНЕ, ДСР, ДПТ, ДНЕТ, ПДТ.
Во ОИК Врапчиште доставени се осум листи со кандидати за членови на совет и седум кандитури за градоначалник. Листи и кандидати за градоначалник имаат: „Најдоброто за мојата општина (СДСМ), ДПА, ДУИ, Алијанса и Алтернатива, Движење Беса, Демократска партија на Турците. ВМРО – ДПМНЕ на изборите ќе настапи само со листа. Во оваа полошка општина има еден независен кандидат и една листа од група избирачи.
Во ОИК Маврово Ростуше листи со 11 имиња за советници се поднесени вкупно шест и има две кандидатури за градоначалници. Доколку се постигне цензусот на излезност, во оваа општина изборите ќе завршат во првиот круг.
До крајниот рок, синоќа на полноќ, до ОИК во Прилеп се поднесени пет кандидатури за градоначалник и осум кандидатски листи за советници.
Според информациите од Општинската изборна комисија, кандидатури за градоначалник и советнички листи поднесоа коалициите на СДСМ, на ВМРО-ДПМНЕ, и на ДОМ и ЛДП – Движење „Одлучно за Македонија“, партијата Интегра, како и еден е независен кандидат.
Општинската изборна комисија во Тетово до крајниот рок за пријавување на кандидатури на локалните избори до 24 часот на 11 септември, има примено седум пријави за кандидати за градоначалници и десет за советнички листи.
Кандидати за градоначалник доставија партиите Движење Беса, ДПА, СДСМ, ДУИ, Алијанса за Албанците и Алтернатива, Движење за држава и правда и Интегра, информира од ОИК Тетово.
Во законскиот рок за пријавување кандидатури за претстојните локални избори доставени се пет пријави за градоначалници и шест за советнички листи, потврдија денеска од ОИК Гевгелија.
Свои кандидати за градоначалници доставиле политичките партии СДСМ, ВМРО ДПМНЕ, Интегра, коалицијата на ЛДП и ДОМ како и еден независен кандидат, а листи со кандидати за членови на Советот доставиле партиите СДСМ, ВМРО-ДПМНЕ, Интегра, коалицијата ЛДП и ДОМ, Левица и независна листа на Томе Ќичуков.
Сите поднесени кандидатури ОИК официјално ќе ги потврди на 18 септември при што кандидатите за градоначалници и советничките листи од една партија при ждребувањето ќе добијат исти редни броеви во сите општини.
