Продолжуваат партиските активности од кампањата за вториот круг од локалните избори што ќе се одржи в недела на 31 октомври.
Денеска истекува рокот за пријавување за гласање во вториот круг на изборите на лицата со Ковид-19 и во изолација. Болните и немоќните, лицата со Ковид-19 и во изолација, како и затворениците, лицата во притвор и во старските домови гласаат еден ден пред изборите, односно на 30 октомври.
Претседателот на СДСМ и премиер Зоран Заев, вчера од Кочани ги повика граѓаните да се обединат, околу политиките што гарантираат напредок, економски раст и подобар животен стандард, најавувајќи дека од први јануари минималната плата ќе биде 18 илјади денари.
Лидерот на ВМРО-ДПМНЕ Христијан Мицкоски, вчера на средбите со граѓаните на Охрид, Пештани, Рача, Елшани и другите населени места ги повика на голема масовност и на 31 октомври да изберат нова иднина, како што рече, „иднина на проекти, победи и на промени“.
–Тие што ветуваа живот за сите, се прават за да немаме општество за сите, туку да бидеме што поподелени, осиромашени, обесхрабрени, луѓето да бидат без волја и верба во системот. Лекот за тоа е новата иднина, затоа велиме, да изградиме нова иднина. Ние нема да ја вратиме Македонија назад туку ќе ја однесме во 2022 и во ЕУ со успеси, многу реализирани проекти, силна економија и подобар живот за сите, рече Мицкоски.
На мини митингот во Вевчани, пак, Мицкоски побара масовна поддршка од граѓаните за промени.
– Влегуваме во финишот на овие избори, кои ја определуваат нашата посветеност кон промени за постигнување на она што заеднички ни е потребно, а тоа е нова иднина, истакна Мицкоски во Вевчани, од каде ја побара довербата на вевчанци за поддршка на кандидатот за градоначалник Спасе Кочовски и повика на масовна излезност в недела на 31 октомври.
– Време е да ги надминеме разликите и да се мобилизираме и обединиме, да покажеме слога и заедништво во намерите да се направи подобро. Потребни сме и сите на Македонија. Потребни сме сите заедно да се бориме рамо до рамо и само така ќе успееме сложно. Ако пропадне вашиот глас и останете дома тие ќе успеат и ќе мислат дека ве надмудриле. Ќе мислат дека добро правеле досега и ќе се охрабрат во се она што го прават, а сите нас не тишти и го сметаме за лошо и погрешно. Да покажеме дека самите сме господари на сопствените судбини и дека никој, ама баш никој ја нема нашата волја во џеб за да си поигрува со нејзе, истакна Мицковски.
Двајцата противкандидати за главниот град, актуелниот и кандидат за градоначалник на Скопје од СДСМ и Коалицијата Петре Шилегов и независната кандидатка поддржана од ВМРО-ДПМНЕ и Коалицијата Данела Арсовска, со ветувања за подобар живот на скопјани.
Шилегов оствари средби со граѓани на Бутел каде што потенцираше дека Бутел е општина со најбрз развој во изминатите четири години.
Арсовска, пак, на средби со граѓани од Кисела Вода, рече дека Кисела Вода ќе стане урбана населба според програмата што ја нуди.
– Програмата е направена според вашите потреби, секојдневните проблеми, маки и барања за решенија. И затоа ќе почнеме да работиме уште од првиот ден и за 82 дена ќе биде многу направено, што некој не успеал да направи ни за четири години, ние тоа ќе го направиме за 82 дена. А останатиот дел, поголемите и покрупни проекти ќе бидат решени уште во првата половина од мандатот. Ако нешто се сака и се може, а сите овие барања се потребни и затоа проектите се реални и остварливи, истакна Арсовска.
Таа им порача на жителите на Кисела Вода дека обврска на Град Скопје е генералниот план да им го даде на увид на граѓаните, да знаат што се планира и што ќе се гради во иднина.
