Во политиката човек може да има многу отворени опции, но има само една работа што ниту еден разумен човек не смее да ја направи ниту во сон, напиша по денешната лидерска средба професорката Татјана Каракамишева.
„Во политиката човек може да има многу отворени опции, многу отворени патишта, многу чекори што може или не може да ги направи, многу работи за кои вреди или не вреди да размислува! Во политиката сите опции, сите преземени или не преземени чекори, сите патишта можат или не можат да бидат оправдани и разбрани од другите! Но, во политиката има само една опција, има само една работа и само една константа која ниту еден разумен човек не смее да ја направи ниту во сон – тоа е опцијата, чекорот, патот што води кон предавство на сопствената татковина и сопствениот народ!“, порача професорката.
По завршувањето на денешната лидерска средба во скратен состав лидерот на опозициската ВМРО-ДПМНЕ Христијан Мицкоски изјави оти на неа се разговарало за теми кои биле дел од веќе отворените преговори во март-април и оти за некои од нив позицијата и опозицијата успеале да ги приближат ставовите, а за некои од нив тоа не е направено.
– Ако веќе се стремиме кон европските принципи треба така и да се однесуваме, а не само декларативно, треба да ги почитуваме Уставот и законите, а не да поставуваме повеќесмислени прашања за граѓаните, рече Мицковски, кој посочи дека разговорите продолжуваат или во недела навечер или понеделник наутро.
На состанокот, рече тој, се уште не се отворила темата за евентуалната можна формулација на референдумското прашање кое вчера го соопшти премиерот Заев, а кое гласи: Дали сте за ЕУ и НАТО со прифаќање на договорот меѓу Република Македонија и Република Грција.
Како што најави Мицкоски, за сите овие прашања денеска ќе разговараат највисоките партиски тела – Извршниот комитет и на Централниот одбор на ВМРО-ДПМНЕ.
Претходно премиерот Заев порача дека стратешка цел на Република Македонија е полноправно членство во ЕУ и НАТО и оти нема компромис за тие стратешки цели, но и оти нема директна или индиректна амнестија. Лидерот на ДУИ Али Ахмети, пак, побара да не се пропушти историската шанса за државата, а претседателот на БЕСА Билал Касами најави придонес за постигнување договор меѓу партиите во интерес на формирање на ДИК и успешен референдумски процес.
