Американската морнарица ќе започне редовни патроли крај бреговите на Русија на Арктикот за да го „обесхрабри напредувањето на Москва на крајниот север“, изјави секретарот за одбрана Кенет Брајтвајт.
Тој истакна дека во наредните години Вашингтон ќе мора да дејствува „поупорно“ на Арктикот со цел да ги предизвика руските, но и кинеските „претензии“.
На прашањето дали САД треба да спроведат „операции за навигација“ на северниот брег на Русија, Брајтвајт ја спореди ситуацијата во регионот со ситуацијата во Јужното кинеско море, каде Кина има територијални спорови со некои земји.
„Морските патишта на северот стануваат пловни и американската морнарица ќе им гарантира на нашите партнери слобода на навигација“, рече тој.
Тој ја нарече оваа стратегија „похрабра позиција“, „право и должност“ на САД како „доминантна поморска моќ во светот“.
Според него, главната предност на САД на Арктикот се подморниците. Но, додаде тој, американската морнарица ќе мора да ангажира мразокршачи од сојузниците, додека Русија има цела флота на мразокршачи, а Кина гради бродови со брзина со која САД „не можат да се натпреваруваат“.
Фактот дека САД го зголемуваат присуството на воени бродови на Арктикот, претходно го објави рускиот министер за одбрана Сергеј Шојгу. Според него, воено-политичката состојба во регионот е комплицирана од конкуренцијата на водечките земји во светот за пристап до ресурси и транспортни комуникации. Русија активно ја развива Северната флота со цел да ги зајакне своите одбранбени способности и да ги обезбеди своите национални интереси на Арктикот, нагласи тој.
Руското Министерство за надворешни работи исто така изрази загриженост дека САД го зголемуваат своето воено присуство во регионот на Арктикот, истакнувајќи дека Москва останува посветена на мирната соработка.
