Сашо Мијалков останува во притворот во Шутка, одлучи на нејавна седница скопскиот Апелационен суд.
Жалбата на бранителот на Мијалков е отфрлена како неоснована. Првостепеното решение на судечкиот совет во предметот Тврдина Таргет останува да важи.
Пред две недели кривичниот суд во Скопје за случајот со масовното нелегално прислушување му изрече 12-годишна затворска казна на Мијалков и од куќен притвор му го преиначи решението за затворски притвор во траење од 60 денови.
Поранешниот директор на УБК Мијалков неколку дена пред изрекувањето на пресудата исчезна по што беше прогласен за бегалец и беше распишана меѓународна потерница по него.
Два дена подоцна, Мијалков сам се појави во Обвинителството за организиран криминал. За бегството е отворена истрага, но досега никој во надлежните институции не понесе одговорност за бегството кое се случи откако обвинителката Рускоска пријавила таква можност еден ден пред Мијалков да исчезне.
