Потребите на угостителскиот сектор од Куманово ќе влезат во програмата на идниот градоначалник, вели Сајкоски.
Носителката на кандидатската листа за советници на Куманово од ВМРО-ДПМНЕ Елена Доцевска-Божиновска, заедно со генералниот секретар на партијата Ѓорѓија Сајкоски и членот на Извршниот комитет Гордана Димитриевска-Кочоска денеска остварија средби со претставници од Здружението на угостители од Куманово пред кои ја презентираа изборната програма.
– Угостителите беа најпогодени од кризата. Разговараме за идните решенија и политики на Куманово. Дадовме гаранција дека во следниот период и угостителите и стопанствениците и граѓаните на Куманово ќе бидат директно вклучени во работата на општината и со поддршка на идниот градоначалник Тони Михајловски и со идниот претседавач на Советот на општината, Елена Божиновска. Ќе направиме она што во изминатиов 30-годишен период не беше направено, изјави Сајкоски.
Додаде дека она што дополнително ќе произлезе од средбите со угостителскиот сектор и со останатите сектори ќе биде вградено во програмата на градоначалникот и ќе биде стопроцентно реализирано.
Во програмата на ВМРО-ДПМНЕ стои дека ќе се воспостави перманентна координација со овој сектор, особено при изготвување на програмите за локален економски развој и за културни манифестации.
-Ќе направиме напори да се намалат локалните такси и надоместоци, имајќи ги предвид забраните за работа со кои се соочуваат угостителите, велат од ВМРО-ДПМНЕ.