Од почетокот на пандемијата до сега во Северна Кореја се тестирани над илјада луѓе за корона вирусот, меѓу кои немало заразени лица..
Како што потврдува за „Си-Ен-Ен“ претставникот на Светската здравствена организација за оваа земја, Едвин Салвадор, од 16 јуни во Северна Кореја се тестирани 1.211 лица, а сите резултати биле негативни.
СЗО наведува дека тестирањето се врши во 15 лаборатории низ целата земја, додека Централниот хигиенски анти-епидемиски институт останува референтна лабораторија.
Властите во Северна Кореја исто така ја проверуваат температурата на граѓаните, а на сите јавни места, вклучително и трговските центри, рестораните и хотелите, се поставени средства за дезинфекција.
Информациите во врска со Ковид-19 се објавуваат на телевизија, радио, печатени медиуми, како и преку системи за јавно обраќање.
Сите образовни институции во земјата, вклучително и градинките, во моментов се на продолжен летен одмор што ќе трае наредните два месеци.
Салвадор соопшти дека во карантин се 696 работници во пристаништето Нампо на западниот дел од брегот и на преминот Синуиѕу-Дангдонг кој се наоѓа на границата меѓу Кина и Северна Кореја.
Зголемувањето на бројот на луѓе кои се во карантин се должи на зголемениот обем на транспорт на стока преку пристаништето Нампо и на граничниот премин Синуиѕу-Дандонг. Приоритет во транспортот на стоки е даден на лекови, вакцини и медицински производи поврзани со Ковид-19, соопшти претставникот на СЗО во Северна Кореја.
