Трговците од Македонија се подготвуваат за протести пред косовската граница, откако веќе четири дена е на сила одлука на Приштина за повисока царина на увезените земјоделските производи.
Тие денес на Кванташкиот пазар во Скопје беа разочарани. Бараат Владата да донесе контра мерки за Косово, зашто овошјето и зеленчукот веќе скапува на пазарите на големо. Цените трикратно се намалени, но никој не купува.
Според Царинската управа во Косово денес влегол само еден камион со земјоделски производи, што е безначајна количина наспрема просекот од двесте тони дневно.
Македонската Влада се уште тактизира. Неизвесно е дали ќе воведе контра мерки, но и на кој начин тоа би се спровело, зашто македонскиот извоз во Косово годинава бил вреден 100 илјади евра, а увозот од таму само 12 илјади.
За проблемот со повисоката царина што за регионот ја воведе Косово реагираше и Европската Комисија. Бара итни појаснувања од косовската влада и очекува Приштина да ги исполни обврските од Договорот за стабилизација и асоцијација и регионално да соработува.
Од Косово тврдат дека повисоката царина е од времен карактер со цел да се заштити домашното производство. В среда во Белград министрите од Македонија, Србија, Црна Гора и Босна и Херцеговина ќе бараат решение за косовската царина.
