Американскиот претседател денеска истакна дека во зависност од резултатите на истрагата ќе бидат зајакнати процедурите за гласање во иднина
Американскиот претседател Доналд Трамп изјави оти ќе нареди да се спроведе голема истрага за наводните измами за време на претседателските избори во САД во ноември.
Тој утрово напиша на Твитер дека истрагата ќе ги опфати гласачите од повеќе од една држава оние што се нелегални, па дури и оние што се регистрирани на списоците, а се починати.
Трамп додаде дека во зависност од резултатите на истрагата ќе бидат зајакнати процедурите за гласање.
Вчера, пред конгресните лидери тој изјави дека можеби и до пет милиони лица гласале нелегално на изборите во ноември, но Белата куќа не го поддржа со никаков доказ неговото тврдење.
Кратко по тоа, претставникот на Белата куќа, Шон Спајсер, го потврди мислењето на претседателот на редовниот, секојдневен, брифинг.
Спајсер посочи дека според анализите и доказите, обезбедени поради вниманието на Трамп, 14 проценти од гласачите на изборите не се американски државјани.
На изборите на 8 ноември минатата година кандидатот на републиканците Доналд Трамп го загуби народното гласање, во кое неговата противничка Хилари Клинтон доби 2,9 милиони гласови повеќе од него, но тој ги доби изборите благодарение на распределбата на електорите на државите во Изборниот колеџ.
