Кинеските власти ја критикуваа и одговорија на изјавата на американскиот претседател Џо Бајден, кој рече дека Соединетите Американски Држави ќе го бранат Тајван доколку е потребно во случај на нивен конфликт со Кина.
Портпаролот на кинеското Министерство за надворешни работи, Ванг Венбин, ги коментираше изјавите на Бајден јавија агенциите.
„Тајван е нераскинлив дел од Кина. Странската интервенција е неприфатлива кога станува збор за Тајван“, рече Венбин.
Тој исто така кажа дека Кина одлучно ги брани своите интереси и нема да отстапи од нив.
„Никој да не се обидува да ја тестира решителноста и капацитетот на Кина да го брани својот суверенитет и територијален интегритет“, рече тој.
Истовремено ги повика САД да го почитуваат принципот на интегритет на Кина и да не даваат погрешни сигнали на сепаратистичките кругови во Тајван.