Заминувањето на Алекс Дујшебаев многумина претпоставуваа дека ќе биде голем проблем за Вардар оваа година, меѓутоа Хорхе Македа, кој зад себе има одлична сезона, се погрижи тоа да не биде така.
Македа годинава постигна многу важни голови за Вардар во Лигата на шампионите, а како што беше публиката навикната и од претходно одлично си ја вршеше својата работа во одбраната.
Од вчера може да се каже дека тој е и еден од најголемите херои на вардарци, со голот од аут кој го постигна на пет секунди до крајот на гостувањето во Кил, гол со кој му донесе победа на Вардар и го однесе скопскиот тим чекор поблиску до Ф-4 во Келн.
Хорхе, кој е во Вардар од 2015 година, но за голема жал на фановите на Вардар од наредната сезона најверојатно се сели во унгарски Пик Сегед, долги години беше во врска со познатата шпанска ракометарка и репрезентативка на оваа земја Макарена Агиљар, а од ред 10 месеци е и во брак со неа.
Макарена во последниве две години настапува во германски Турингер, а пред тоа беше дел од Сагунто, Ичако, Рандерс, Ѓер, Ростов Дон и Шиофок.
Таа има доста трофеи во својата кариера на клупско ниво, а со репрезентацијата има златен медал на Медитеранските игри во 2005 година, сребро на Европското првенство во 2008 година, на Светското првенство беше трета во 2011 година, а со бронза може да се пофали и од едно Светско првенство во 2011 година и од Олимписките игри во 2012 година. На 88 меча за репрезентацијата има 253 гола.
