Брзото повлекување на американската војска од Авганистан врши силен притисок врз Централната разузнавачка агенција на САД (ЦИА) да најде нови начини за собирање разузнавачки информации и спроведување на антитерористички операции во оваа земја.
ЦИА, која беше во основата на 20-годишното присуство на САД во Авганистан, наскоро ќе изгуби бази во земјата од каде што спроведуваше борбени мисии и напади со беспилотни летала, внимателно следејќи ги талибанците и другите групи како Ал Каеда и Даеш. Аналитичарите на Централната разузнавачка агенција предупредуваат на растечките ризици поврзани со талибанците, пишува „Њујорк тајмс“.
Американските власти работат во последен момент за да обезбедат бази во близина на Авганистан за идните операции. Сепак, комплексноста на тековниот конфликт доведе до трнливи дипломатски преговори, а војската се обидува да ги повлече сите сили на почетокот и средината на јули, нешто пред 11 септември, крајниот рок утврден од американскиот претседател Џо Бајден, според американскиот весник.
Еден од фокусите беше Пакистан. ЦИА ја користеше тамошната база со години за да започне беспилотни напади против милитантите во западниот дел на земјата, но таа беше исфрлена од објектот во 2011 година, кога американските односи со Пакистан станаа комплицирани.
Според весникот, во разговорите меѓу американски и пакистански официјални лица, Пакистанците барале ограничувања во замена за користење на базата во земјата.
Дипломатите исто така ја истражуваат можноста за враќање на базите во поранешните советски републики кои беа користени за војната во Авганистан, иако очекуваат рускиот претседател Владимир Путин жестоко да се спротивстави на тоа, пишува „Њујорк Тајмс“.
Неодамнешните извештаи на ЦИА и военото разузнавање за Авганистан се многу песимистички. Тие ја истакнуваат победата на талибанците во повеќе делови и предупредуваат дека Кабул исто така може да падне во рацете на талибанците и да стане безбедно засолниште за милитантите склони кон напади на Запад.
Како резултат на тоа, американските власти гледаат потреба за долгорочно собирање разузнавачки информации, покрај воената и контратерористичката операција на ЦИА, во Авганистан и по истекот на рокот за повлекување на трупите поставен од Бајден.
Тешкотиите околу базите илустрираат како американските власти сè уште немаат долгорочен план за решавање на безбедносните прашања во земја каде што потрошиле милијарди долари и изгубија повеќе од 2.400 војници во текот на скоро две децении, додава весникот.
