Црна Гора не ја исклучува можноста за директна воена закана, иако таа опасност е значително намалена поради местото и значењето што го има за стабилноста на регионот, стои во нацрт-стратегијата за национална безбедност на оваа балканска земја која минатата година е примена во НАТО, пишуваат медиумите во Подгорица.
Во тој документ на црногорската влада, како што пишуваат одделни медиуми во Подгорица, се наведува дека безбедносната ситуација во Црна Гора треба да се гледа во регионален контекст бидејќи таа им припаѓа и на Балканот и на Медитеранот.
Во него се додава дека Црна Гора дели заеднички стратешки пристап кон предизвици, ризици и закани за националната безбедност кои се дефинирани со стратешките документи на НАТО.
„Регионот сè уште е оптоварен со настани од минатото и нерешени проблеми, што може да предизвика дестабилизација во одредени области”, рече тој.
– Како резултат на намалувањето на воените сили во регионот, интеграцијата на земјите во НАТО и во ЕУ, како и развивање на политика на доверба, соработка и партнерство, опасноста од директна воена закана за Црна Гора е значително намалена, но не може да се исклучи – се вели во предлог-стратегијата.
Црногорскиот министер за одбрана, Предраг Бошковиќ, претходно изјави дека главната причина за донесување нова стратегија се изменетите безбедносни околности, не само во Црна Гора, туку и во регионот и во Европа, наведувајќи дека во 2008 година, кога е пишувана последната стратегија, немало ни мигрантска криза ни конфликт во Украина меѓу владата и проруските бунтовници поддржани од Русија.
Црногорскиот парламент треба да разговара за нацрт-стратегијата на националната безбедност на Црна Гора во октомври.
