Голем број Македонци во моментов се наоѓаат на Халкидики каде има страшно невреме и поплави. Меѓу нив е и поп-пејачот Ѓоко Таневски кој објави неколку видеа на социјалните мрежи каде може да се види како улиците се претворени во реки, а автомобилите пливаат. Сепак, Таневски вели дека невремето не било толку страшно, барем не во делот каде што престојувал тој и додава дека се е во ред со него и семејството и веќе се на пат за назад во Македонија.
Македонски граѓани кои летуваат во Грција досега не побарале помош и не пријавиле штети по вчерашното невреме што го зафати полусотровот Халкидики.
Нема јавувања ниту за поплавени објекти во кои се сместени туристите.
Од македонското Министерство за надворешни работи засега немаат информации за евакуирани туристи и пријавени материјални штети на возилата.
Од туристичките агенции кои ги контактираше МИА информираат дека не се откажуваат аранжманите и оти немаат јавувања за поголеми поплавувања на вилите и апартманите во кои се сместени туристите освен дека во некои делови на вториот крак немало струја.
Нема пријави ниту за оштетени возила. Од осигурителните компании велат дека се уште е рано за такво нешто бидејќи пријавата се прави со полициски записник од самото место.
