Претседателот на Р.Македонија Ѓорѓе Иванов, во своето десетминутно обраќање до јавноста по повод законот за употреба на јазиците со кој практично се воведува двојазичност на територија на целата држава, а согласно барањата од т.н. Тиранска платфрома, информираше дека нема да го потпише указот со кој се прогласува законот
Како што објасни претседателот, Македонија е унитарна и мултиетничка држава, а со овој закон се укинува ваквиот принцип и се воведува бинационализам, со што се нарушува унитарноста на земјата.
-Во извршувањето на функцијата Претседател на Република Македонија секогаш сум пристапувал одговорно и со целосно почитување на Уставот, законите и интересите на граѓаните на Република Македонија. На 11 јануари 2018 година, Собранието на Република Македонија го изгласа Законот за употреба на јазиците, без јавна расправа, без научна дебата, без вклученост на академската и експертската јавност и без опозицијата. Уште пред да биде изгласан, во повеќе наврати укажав дека не е добро кога прашања кои се веќе апсолвирани повторно да се отвораат заради добивање на краткорочни политички поени, а на штета на трајните интереси на Република Македонија и македонскиот народ. Во последното годишно обраќање потенцирав дека овој закон е донесен со европско знаменце, без притоа да постои европска директива што налага усогласување на македонското законодавство со законодавството на Унијата. Со овој закон, Република Македонија ќе стане можеби единствената европска држава која сама си поставува услови за членство во Унијата кои никој не ги бара. За апсурдот да биде поголем, дури и укажувањата на претставниците на Европската Унија не беа испочитувани и беа игнорирани, рече претседателот Иванов.
Додаде и дека поради дневнополитички шеми, се злоупотребуваат процедурите за да се носат закони кои се на штета на државата. Иванов посочи дека злоупотребата на „европското знаменце“ на законот за двојазичност била предмет на забелешка и на претставниците од ЕУ, но ова владеачко мнозинство не го земало тоа во предвид.
Објаснува дека овој закон е системски и е нелогично истиот да се носи со просто мнозинство, злоупотребувајќи ги европските институти.
Потенцираше дека законот е неуставен, а дека до Собранието испратил детално правно образложение кое апелираше да биде земено во предвид од пратениците.
-Со овој закон се воведува многу скап паралелизам во сите органи на државната власт што води кон нивна целосна блокада и нефункционалност. Во услови на блокада постои опасност да се отвори прашањето за уставното редефинирање и загрозување на унитарноста, суверенитетот и територијалниот интегритет на Република Македонија. Наместо во духот на дијалогот и соживотот да градиме мултиетничко општество преку праведни и општоприфатени закони, ние донесуваме неправеден и репресивен закон со кој се фаворизира само албанскиот јазик. Затоа, имајќи ги предвид моите согледувања за неусогласеноста на Законот за употреба на јазиците со Уставот, но и изнесените укажувања на експертската и пошироката јавност за противуставноста на овој закон, а врз основа на член 75 од Уставот на Република Македонија, донесов одлука да не го потпишам указот за прогласување на Законот за употреба на јазиците. Денес упатив писмо до Собранието на Република Македонија со кое информирам дека не го потпишувам указот за прогласување на Законот за употреба на јазиците. Во прилог на тоа писмо се наоѓа и деталното правно образложение на мојата одлука. Ги повикувам пратениците на Собранието на Република Македонија внимателно да ги разгледаат моите забелешки. Очекувам од нив одговорно и совесно да постапат, затоа што само така ќе дојдеме до сеопфатно решение за вистинско унапредување на употребата на јазиците, без притоа да се создаваат поделби, порача Иванов.
