Претседателот на Македонија, Ѓорге Иванов изјави дека мигрантската криза допрва почнува, затоа што во непосредна близина на надворешните граници на Европа се наоѓаат помеѓу 20 и 30 милиони потенцијални мигранти.
Иванов во Бугарската академија на науките во Софија, одржа предавање на тема „Миграциите и мигрантите: предизвици за третиот милениум“ и објасни дека како што бројот на бегалците ќе се зголемува, така волјата и подготвеноста на Европската унија да ги прифаќа и интегрира ќе се намалува.
„Замислете го парадоксот со кој се соочуваме. Македонија која не е членка на Европската унија ја чува Европа од ЕУ“ – рече Иванов.
Смета дека мигрантската криза придонела кон дополнително затегнување на односите меѓу државите. Цената, како што наведе Иванов која ќе ја платат за несоработката е прескапа. Вели дека колку е послаба соработката меѓу државите, толку е посилна соработката меѓу криминалците.
Во наредните пет години Иванов рече дека земјите ќе се соочат со два предизвика, да се обезбеди контрола на коридорите преку кои се префрлаат мигрантите и да се обезбеди контрола врз слободното движење на мигрантите кои веќе се наоѓаат на Шенген зоната.
