Го поддржувам правото на протест, но и го осудувам секој напад врз полицијата бидејќи тоа е и напад врз Република Македонија, истакна денеска министерот за внатрешни работи Оливер Спасовски, во врска со вчерашниот инцидент на Табановце во кој беше повреден полицаец при протестот на ВМРО-ДПМНЕ.
– Удирањето по полицаец значи удирање врз Република Македонија. Институциите мора да функционираат и обратно ако полициски службеник го прекрши законот и тој треба да сноси одговорност. Тоа полицајците добро го знаат, со тоа што и внатрешната контрола постапува ефикасно по предмети, а за сметка на тоа и граѓаните ќе треба да се однесуваат по правилата и прописите, истакна Спасовски, одговарајќи на новинарско прашање по пуштањето на новата полициска станица во Ѓорче Петров.
Доколку се земе предвид оваа изјава на Оливер Спасовски дека „Удирањето по полицаец значи удирање врз Република Македонија“ тогаш тој признава дека СДСМ на 5 мај 2015 година удирала директно врз Македонија- удирајќи по 38-те полицајци.
Јавноста отворено го прашува министерот Спасовски дали ќе има пријава за тероризам против Зоран Заев?
Инаку да потсетиме дека на 5 мај 2015 година под превезот на граѓански протест беше организиран насилен упад во објектот на Владата на Република Македонија во кој беа нападнати и повредени припадници на безбедносните сили.
На 5-ти мај 2015 година во нападите на вандалите и насилниците беа повредени триесет и осум полицајци, од кои шест посериозно, еден повреден цивил и голема материјaлна штета.
За време на протестот уништени беа седум полициски возила и друга опрема, искршени прозорците на Радио Слободна Македонија, а беше симнато и македонското знаме од јарболите пред Владата.
Исто така беа нападнати и новинарски екипи, оштетени камери и возила.
Насилствата почнаа како наводен спонтан граѓански протест по повод објавување на тн бомби од страна на Зоран Заев, но во еден момент преминаа во отворено насилство и хулиганство насочено кон полицијата.
Како што известуваа медиумите тогаш видно беше присуството на партиски активисти на СДСМ , но и нивни високи функционери. Според снимките на медиумите присутна на насилниот настан била и Радмила Шекеринска, заменик претседател на СДСМ.
