На првообвинетиот во „Меѓународен сојуз“, Бојан Јовановски, му дадов вкупно 250 илјади евра од продажба на три стана кои ги поседував за наводните проекти кои ги нудеше, и сега сум на улица.
Ова е дел од емотивното сведоштво на Јованка Кухар, која по барање на обвинителството дава исказ за случајот.
Рече дека иако била назначена за проектменаџер во невладината и потпишувала договори со бизнисмените Мицевски и Амзоски, Јовановски не дозволувал да ги читаат.
– Бојан, ти не дозволуваше да ги читаме договорите, бев принудувана да ги потпишувам со ветување дека треба да ти верувам, изјави Кухар во судницата.
Атмосферата се вжешти откако таа кажа дека додека траело судењето за „Рекет“, и се јавил сопругот на обвинетата Христина Блажевска и побарал таа да потпише празен лист. На ова бурно реагираше Блажевска која стана од местото и сакаше да ја напушти судницата. Реагираше и Јовановски кој ја обвини дека лаже и треба да се срами од тоа што го кажала.
На денешното судење ќе сведочи и Лилјана Тодоровска која е автор на проектот за старечки дом кој требало да го гради Меѓународниот сојуз.
