Денес успешно спречен обидот на СДСМ да го прошверцуваат законот за трговија со опојни дроги, кој е посебно битен за бизнисот на лицата З.З., В.З. и Биг Мајк!, напиша на Фејсбук пратеникот од ВМРО-ДПМНЕ, Антонијо Милошоски после денешната седница на Собраниската комисија за здравство на која се расправаше по овој предлог закон.
Со новиот Предлог – закон требаше да се овозможи извоз на сув цвет добиен со одгледување на канабисот за медицински цели, така што на правните лица одгледувачи на канабисот им е овозможено веќе произведените количини на сув хербален производ како опојна дрога да ги пласираат на пазарите во Европа и пошироко, при тоа почитувајќи ги меѓународните Конвенции и европското законодавство што ја регулира материјата.
ВМРО-ДПМНЕ обвини дека законот се носи шверцерски и набрзина без јавна дебата со вклучување на повеќе засегнати страни. Пратениците од ВМРО-ДПМНЕ ја повикаа СДСМ да го стави законот во програмата па ако добијат поддршка нека го спроведат. Според нив овој закон не носи бенефит за граѓаните туку само за одредени поединци.
ВМРО-ДПМНЕ претходно посочи дека Со овој Закон, практично се штитат бизнис интересите на Заев, особено ако се знае дека блиски на Заев се во бизнисот за производство на масло од канабис, а фамилијата „дебело“ профитира од тој бизнис.
