Британскиот премиер Енди Барнам повика на воведување пишан устав

Британскиот премиер Енди Барнам повика на воведување пишан устав во Велика Британија. Премиерот, кој е на функцијата веќе две недели, во неделата се заложи за „нов сет на јасни принципи за тоа како треба да се управува со оваа земја“ и ја нагласи потребата од пишан устав.

За разлика од повеќето земји, Обединетото Кралство нема единствен, обврзувачки пишан уставен документ.

Поранешниот градоначалник на Манчестер се залага за децентрализација на земјата и за пренесување на поголеми овластувања на регионалните власти. Тој рече дека верува оти тоа би го отворило патот кон ново уставно уредување, осврнувајќи се на своите планови за децентрализација.

Велика Британија се потпира на непишан, историски развиен уставен систем заснован на закони, судски одлуки и договори.

Идејата за пишан устав е релативно нова. Лабуристичкиот политичар Гордон Браун, кој беше премиер од 2007 до 2010 година, беше меѓу првите поборници за ваква реформа. Барнам беше министер во владата на Браун.

Во тоа време, парламентарна комисија пет години разгледуваше различни можности за кодифицирање на уставот. Сепак, комисијата во 2015 година заклучи дека не постои јасен консензус за ова прашање.

Во Обединетото Кралство – кое го сочинуваат Англија, Шкотска, Велс и Северна Ирска – кон крајот на 1990-тите години беа спроведени значајни уставни реформи, со кои беа формирани децентрализирани парламенти во Единбург, Кардиф и Белфаст.

И покрај тоа, Обединетото Кралство и понатаму останува една од најцентрализираните земји во Европа.

Share on Facebook

Tweet

Follow us

Save