Бугарскиот пратеник Герчев: Гоце Делчев го посвети животот на слободата на Бугарите во Македонија и Одринско

Бугарскиот пратеник Иван Герчев со изјава се осврна на одбележувањето на 154-годишнината од раѓањето на Гоце Делчев, нагласувајќи дека станува збор за личност која зазема исклучително место во историската меморија на бугарскиот народ и претставува едно од највисоките морални обележја во бугарската национална историја. „Завчера, на 4 февруари, ја прославивме сто педесет и четвртата годишнина од раѓањето на Гоце Делчев“, истакна Герчев, потенцирајќи дека значењето на револуционерот и денес има силно место во јавниот и историскиот дискурс во Бугарија.

Според изјавата, Георги Николов Делчев е роден на 4 февруари 1872 година во градот Кукуш, кој беше опишан како центар на жив бугарски дух и национална свест. Уште од најрана возраст, како што беше нагласено, тој бил воспитуван во дух на просветлување, патриотизам и општествена одговорност. Неговото образование се одвивало во Солунската бугарска машка гимназија, која Герчев ја опиша како еден од најважните центри на бугарската преродба. Токму таму, според него, се формирале ставовите на Делчев за слободата, националното единство и потребата од организирана борба за национално ослободување.

Животниот пат на Гоце Делчев, како што беше наведено во изјавата, бил обележан со свесен и јасен избор – да го посвети својот талент, знаење и личен живот на каузата за слободата на Бугарите во Македонија и Одринско. Тој, според Герчев, свесно се откажал од можноста за лично исполнување и сигурна иднина, целосно посветувајќи се на револуционерната дејност и јавната служба. Како еден од најистакнатите водачи и идеолози на Внатрешна Македонско-одринска револуционерна организација, Гоце Делчев одиграл одлучувачка улога во ослободителното движење.

Според Герчев, неговиот придонес бил клучен во идејното обликување, организацијата и насочувањето на револуционерната борба. Со оваа изјава, бугарскиот пратеник уште еднаш го потенцираше значењето на ликот и делото на Гоце Делчев како историска фигура со силно симболично и морално значење во бугарската национална историја.

Share on Facebook

Tweet

Follow us

Save