(Видео) Атанасов: Овде веќе не е хумано да се живее

„Образованието ако го градите невнимателно, ќе добиете крива кула. Секоја промена која не е прифатена, која е еднодимензионална, нема да успее, само може да направи штета, образованието не е далеку отидено во минативе 20 години. Во главите на младите луѓе нема светлина, нема оптимизам, доминираат политичките партии и ако не сте член на партија, вие сте во сива зона. Веќе се чувствуваат резултатите на тие процеси. Недостатокот на филтри на квалитет во партиите не доведе до момент кога секој може да работи на секоја позиција и да се нема доверба во институциите. Младите не заминуваат од општеството, туку масовно бегаат, не најдовме модус за да обезбедиме процеси со кои можат тие да напредуваат, да ги задржиме“ вели универзитетскиот професор Петар Атанасов – поранешен министер за образование во најновото издание на Трилинг.

Професорот смета дека „најквалитетните и понатаму ќе заминуваат за поголеми можности, а вториот проблем е недостаток на основна работна сила. Веројатно ќе се случи да немаме основна работна сила, приватниот сектор веќе се соочува со немање одзив“.

„На политичко-етничките елити во земјава не им требаат промени, убаво живеат. На друга страна е народот, ако сака било што да добие, мислат дека треба да понудат мито и страшно е ова да се слуша, но овој процес како да се зголемува. Народот е соочен со нефункционирање на системот. Се наоѓаме во една општествена ситуација кога не знаете кого да го обвините, а странците нема да ни ги решат проблемите. Внатрешните собитија меѓу заедниците, градовите, луѓето – има голем социјален јаз. Овде веќе не е хумано да се живее“ вели Атанасов.

Share on Facebook

Tweet

Follow us

Save