(Видео) Пентагон објави нови НЛО досиеја со дигитални реконструкции од ФБИ

Американското Министерство за одбрана денеска ја објави петтата серија декласифицирани документи и видеоснимки за неидентификувани аномални појави (УАП), популарно познати како НЛО. Меѓу објавените 640 мегабајти материјал од програмата PURSUE се наоѓаат и дигитални реконструкции направени од ФБИ, кои прикажуваат огромни триаголни објекти забележани над САД во изминатите две децении.

Издадените материјали содржат детални дигитални илустрации направени врз основа на пријави од граѓани и очевидци. Еден од случаите, насловен како „Воздушен триаголник“ од 2002 година, прикажува огромен триаголен објект кој речиси целосно го покрива ѕвезденото небо. Друга реконструкција од 2011 година прикажува темен триаголник со бела светлина на секој од трите агли, додека сведоци го набљудуваат од земјата.

Слични сцени се забележани и во пријави од 2023 година, каде што се опишува речиси проѕирен темен објект над станбена населба, како и триаголник со три црвени светла над паркинг. Најновите реконструкции се однесуваат на инциденти од 2026 година, со црвени светла забележани над планински и пустински предели.

Меѓу декласифицираните документи од Пентагон се наоѓа и извештај на Военоморскиот центар за фотографска интерпретација од 4 мај 1953 година. Документот открива дека американското воено воздухопловство побарало детална анализа на 16-милиметарски филм во боја, снимен над Јута во јули 1952 година, како и дополнителни снимки од Монтана од 1950 година.

Воените аналитичари морале да го копираат и реставрираат оштетениот филм, по што ја зголемиле сликата за 22 пати за да ги следат кадар по кадар движењата на непознатите објекти. Во извештајот се забележува дека заклучоците од анализата тогаш не биле официјално усвоени како конечен став на американската морнарица.

Оваа објава е дел од иницијативата за декласификација на државни документи поврзани со неидентификувани појави и потенцијален вонземски живот, иницирана по наредба на претседателот Доналд Трамп од февруари. Пентагон и Канцеларијата на директорот на националното разузнавање координираат преглед на десетици милиони записи од десетици државни агенции, вклучувајќи ги НАСА, ФБИ и Министерството за енергетика.

Од Пентагон нагласуваат дека објавувањето на документите и видео материјалите само по себе не претставува потврда за вонземско потекло на забележаните објекти.

Share on Facebook

Tweet

Follow us

Save