ВМРО-ДПМНЕ го поздрави апсењето на директорот на Инспекторатот за земјоделие, Анакиев

Владејачката ВМРО-ДПМНЕ го поздрави синоќешното апсење на директорот на Државниот инспекторат за земјоделие, Васе Анакиев, кој наводно бил фатен како прима 50.000 евра како поткуп. Полицијата и ОЈО ГОКК и натаму немаат соопштено никакви официјални информации за апсењето.

„ВМРО-ДПМНЕ доследно се залага за владеење на правото и целосна борба против криминалот и корупцијата, без разлика на политичката припадност. СДСМ не може да сфати кога МВР ќе уапси актуелен директор, затоа што на бандата на Заев и Филипче несфатливо им е законот да важи неселективно и да се применува подеднакво за сите. Секој којшто го прекршил законот мора да одговара“, велат од ВМРО-ДПМНЕ во соопштението.

Анакиев е потпретседател на Социјалистичката партија на Македонија, коалицискиот партнер во власта. Партијата вчера доцна во ноќта се огласи со реакција во која ги поддржува институциите да го истражат директорот, но и го осудува „нападното партиско етикетирање на актуелни случаи со сериозни обвиненија и тенденциозното објавување фотографии со кои се гази врз човековото достоинство, а за што од одговорните е потребно издржано објаснување“.

„Во врска со апсењето на директорот на Државниот инспекторат за земјоделство, ја поздравуваме акцијата на МВР. Ова е порака за сите дека Уставот и законите мора да се почитуваат. Очекуваме надлежните институции целосно да го расчистат случајот, а секој за кој ќе се утврди одговорност да одговара согласно законите“, соопшти ВМРО-ДПМНЕ во својата реакција на апсењето.

Share on Facebook

Tweet

Follow us

Save