Дуров одговори на меѓународната потерница на Москва со среден прст
Русија го обвини основачот на Телеграм, Павел Дуров, за олеснување на терористичка активност, тврдејќи дека популарната апликација за пораки ја користеле украински разузнавачки служби за организирање напади на руска територија.
Како одговор на обвинувањата, официјалниот профил на Телеграм на платформата X објави фотографија од Дуров на која покажува среден прст.
Обвиненијата, кои ги соопшти руската Федерална служба за безбедност (ФСБ), претставуваат кулминација на долгогодишната истрага против Дуров и Телеграм. Русија во меѓувреме значително го ограничи пристапот до платформата како дел од пошироката кампања за намалување на користењето странски технолошки сервиси и заострување на контролата врз интернетот.
Во моментов, голем дел од руските корисници можат да пристапат до Телеграм само преку VPN, иако државните институции, вклучувајќи ги Кремљ и Министерството за одбрана, продолжуваат секојдневно да ја користат платформата за објавување информации.
Телеграм во изминатите години стана една од главните платформи за информирање поврзана со војната меѓу Русија и Украина, а ја користат државни претставници, војници и влијателни блогери од двете страни.
ФСБ: Украински служби регрутирале млади преку четбот
Според ФСБ и рускиот Истражен комитет, украинските специјални служби користеле популарен четбот за запознавање „Daivinchik/Leo“ на Телеграм за регрутирање млади Руси за извршување саботажи и терористички акции.
Во соопштението се наведува дека украински агенти, претставувајќи се како млади жени, воспоставувале контакт со корисници, а потоа ги наведувале да извршат кривични дела.
Руските власти тврдат дека во изминатата година биле уапсени 46 руски државјани на возраст од 12 до 22 години, кои наводно биле регрутирани на овој начин за напади врз полициски службеници или за палење транспортна, енергетска, комуникациска и финансиска инфраструктура.
Од украинска страна засега нема официјален коментар за овие обвинувања.
Дуров на меѓународна потерница
ФСБ соопшти дека Павел Дуров ќе биде ставен на меѓународна потерница, но не прецизираше преку кој механизам ќе се реализира тоа. Од Интерпол засега нема официјален одговор дали Русија поднела барање за издавање „црвена потерница“.
Дуров живее во Дубаи, кој има добри односи со Москва, но неговата екстрадиција би можела да има последици врз имиџот на Обединетите Арапски Емирати како глобален центар за бизнис и технологија.
Минатата недела Дуров објави дека престојува во Грузија, но неговата моментална локација не е позната. Роден е во Русија, а денес поседува државјанства на Обединетите Арапски Емирати и Франција. Тој е основач и на руската социјална мрежа „ВКонтакте“, од која се повлече во 2014 година по притисок од руските власти.
Во 2024 година Дуров беше уапсен и во Франција поради обвинувања дека Телеграм не преземал доволно мерки за спречување криминални активности и не соработувал доволно со органите на прогонот. Подоцна му беше дозволено да ја напушти земјата додека истрагата продолжува.
Дуров ги отфрла сите обвинувања, тврдејќи дека Телеграм ги исполнува, па дури и ги надминува своите обврски во модерирањето на содржините и соработката со властите во борбата против криминалот.
Во април годинава тој објави дека судска покана за „осомничениот П.В. Дуров“ била доставена на адреса во Русија каде што живеел пред околу 20 години, додавајќи дека е „горд“ ако е осомничен затоа што ги брани уставните права на слобода на говор и приватна комуникација.
