INFOMAX.MK

Ризикот од заразни болести се зголемува поради подолгите и потоплите лета ширум Европа, предупреди Европскиот центар за превенција и контрола на болести (ECDC). Блиската соработка преку границите и меѓу различни сектори сега е од клучно значење за ефикасно предвидување, спречување и реагирање на овие закани.

„Додека актуелните топлотни бранови се во центарот на вниманието, токму континуирано повисоките температури кои траат подолг период создаваат услови за ширење на голем број инфекции“, соопшти здравствената агенција.

ЕЦДЦ додава дека климатските промени го прошируваат спектарот на закани за јавното здравје, поради што има сè поголема потреба од долгорочна стратешка соработка меѓу секторите за здравјето на луѓето, животната средина и животните.

ЕЦДЦ особено следи четири области:

Болести што се пренесуваат преку храна

Овие болести се меѓу најчестите летни заболувања, а растот на температурите го забрзува размножувањето на бактериите во храната, предупредува агенцијата.

Според Светската здравствена организација (СЗО), топлото и влажно време создава идеални услови за брзо размножување на микроорганизмите, со што храната може да стане небезбедна — често без видливи промени во изгледот, вкусот или мирисот.

Добрата хигиена помага да се намали ризикот: овошјето и зеленчукот треба да се мијат пред јадење, сировата и зготвената храна да се чуваат одделно, храната темелно да се термички обработи и да се чува на безбедни температури.

Комарци

Болестите што ги пренесуваат комарците стануваат сè почести во Европа, бидејќи подолгите топли и влажни сезони им овозможуваат на инвазивните видови комарци да се размножуваат во региони каде што претходно биле ретки или воопшто ги немало.

Болестите како денга, чикунгуња и вирусот Западен Нил стануваат сè поголема закана за јавното здравје во регионот.

Според СЗО, сезоната на пренос на вирусот Западен Нил обично трае од доцна пролет до есен, со врв во периодот од јули до септември. Годинава случаи се регистрирани во Грција, Италија, Северна Македонија, Романија и Шпанија.

ЕЦДЦ наведува дека добрата заштита вклучува употреба на средства против инсекти, носење заштитна облека и преземање мерки во затворен простор, како поставување мрежи на прозорците, користење клима-уреди или мрежи против комарци.

Луѓето треба да внимаваат и да не оставаат вода да се собира околу домовите или во градините, бидејќи стоечката вода создава услови за размножување на комарците.

Болести што ги пренесуваат крлежи

Крлежите се уште еден вид инсекти кои често се поврзуваат со летото и се распространети низ Европа.

Самите крлежи не предизвикуваат болести, но заразените крлежи преку каснување можат да пренесат вируси или бактерии, предизвикувајќи заболувања како крлежно-пренослив енцефалитис и Лајмска болест, кои можат да доведат до долгорочни здравствени последици.

Вакцинацијата е една од најефикасните мерки за спречување на крлежно-преносливиот енцефалитис, од кој во европскиот регион просечно се регистрираат околу 3.000 случаи годишно.

ЕЦДЦ препорачува носење долги ракави и долги панталони при планинарење или престој во паркови, како и проверка на телото за крлежи и нивно отстранување по престојот на отворено.

Вибриоза

Вибрио е вид бактерија што живее во вода и најдобро се размножува во умерено топли и топли води со умерена соленост.

Бактеријата може да предизвика вибриоза кај луѓето кои престојуваат во контаминирана вода или консумираат контаминирана морска храна.

Иако инфекциите со бактеријата Вибрио сè уште се релативно ретки во Европа, неколку северноевропски земји кои се граничат со Балтичкото Море во последните години пријавиле зголемен број случаи, наведува ЕЦДЦ.

Според агенцијата, ова особено било забележливо во текот на летата со продолжени топлотни бранови и повисоки температури на водата.

Препораките вклучуваат избегнување пливање со отворени рани, гребнатини или неодамна направени пирсинзи. Исто така, темелното готвење на морската храна од овие области помага да се намали ризикот од инфекција.

ЕЦДЦ го следи ширењето на бактеријата преку интерактивна мапа, која се ажурира секојдневно и содржи петдневна прогноза.