INFOMAX.MK

Седум лица се лишени од слобода поради случаи на семејно насилство во повеќе градови низ државата, информираат од Министерството за внатрешни работи. Три од приведените се во Скопје, двајца во Кавадарци, а по едно лице во Струмица и Гостивар.

Во Скопје, на подрачјето на Бит Пазар, полицијата привела 41-годишна жена поради сомнение дека физички ја нападнала својата 66-годишна свекрва. Во поврзан случај, друга 41-годишна жена пријавила дека била нападната со тврд предмет од нејзината свекрва. Исто така во Бит Пазар, била приведена и 46-годишна жена која, според пријавата, со тврд предмет ја нападнала својата 27-годишна ќерка. Во скопско Драчево, пак, бил уапсен 56-годишен маж кој наводно физички ја нападнал својата сопруга.

Во Кавадарци, полицијата привела 48-годишен маж осомничен дека го нападнал и му се заканувал на својот 74-годишен татко. Подоцна истиот ден, бил приведен и 40-годишен маж кој, според пријавата, физички ја нападнал својата поранешна сопруга и упатувал закани.

Во Струмица, 27-годишен маж бил лишен од слобода поради сомнение дека ја нападнал својата сопруга во семејниот дом, додека во Гостивар била приведена 30-годишна жена по пријава од нејзината свекрва за физички напад.

Од МВР информираат и за пријава во Охрид, каде 41-годишна жена навела дека нејзиниот партнер физички ја нападнал неколку дена претходно.

Оттаму најавуваат дека по целосно документирање на случаите ќе бидат поднесени соодветни пријави.