Миноски: Подигнувањето на прагот за ДДВ е клучно за опстанок и раст на малите бизниси

Поранешниот министер за финансии, Кирил Миноски, во својата последна анализа укажува на итна потреба од ревидирање на даночната политика во Македонија преку подигнување на прагот за регистрација за ДДВ. Според него, сегашниот праг од 2.000.000 денари (околу 32.000 евра) е значително понизок во споредба со земјите од регионот, што претставува кочница за микро и малите претпријатија.

Миноски посочува дека во Србија, Хрватска и Словенија овој праг изнесува околу 60.000 евра, додека во Албанија е дури 80.000 евра. Со оглед на тоа што 97% од фирмите во земјава се микро и мали бизниси, тој смета дека повисокиот праг ќе им овозможи на претприемачите поголем простор за развој без оптоварување со сложени административни процедури.

„Подигнувањето на прагот за ДДВ ќе значи намален притисок за користење краткорочни кредити, поголема ликвидност и повеќе простор за инвестиции во иновации и повисоки плати. ДДВ се плаќа дури и кога фактурата не е наплатена, што е огромен товар за малите фирми“, истакнува Миноски.

Во однос на прашањето дали државата би изгубила приходи со ваквата мерка, Миноски тврди дека ефектот би бил спротивен. Тој објаснува дека државата ќе ги наплати средствата индиректно преку повисоки социјални придонеси и персонални даноци кои произлегуваат од растот на платите и зголемената потрошувачка.

„Со повисок праг ќе се избегне вештачкото делење на фирмите и прикривањето на прометот со цел да се остане надвор од системот на ДДВ. Тоа ќе доведе до поголема доброволна усогласеност и помал притисок врз Управата за јавни приходи (УЈП)“, додава тој.

Според него, економските политики често ги креираат луѓе кои не ги разбираат реалните предизвици на теренот. Миноски заклучува дека поддршката на претприемништвото е единствениот пат кон подобра економија и повисок животен стандард.

Share on Facebook

Tweet

Follow us

Save