Несекојдневен инцидент: Возило од придружбата удрило во автомобилот на хрватскиот премиер Пленковиќ

Денес во центарот на Загреб се случи необичен инцидент кога автомобил што го придружувал хрватскиот премиер Андреј Пленковиќ удрил во автомобилот во кој седел премиерот. Несреќата се случила на улицата Савска, а во судирот нема повредени.

Хрватската влада потврди за Индекс дека инцидентот се случил откако премиерот се вратил од седница на Владата.

„По враќањето од седницата на Владата од Националниот спортски комплекс, на улицата Савска се случила мала сообраќајна несреќа во која учествувале две возила од заштитен конвој. Никој не е повреден. Во несреќата немало други возила вклучени, ниту пак пешаци биле загрозени“, соопшти Владата.

Полицијата спроведе истрага на лице место за да ги утврди сите околности на судирот.

Пленковиќ бил во луксузен блиндиран автомобил Audi A8 L Security, специјално модифицирана лимузина од германски производител. Станува збор за возило што го користи хрватското Министерство за внатрешни работи за превоз на врвни државни функционери и лица со прва категорија на заштита.

Поради инсталираните челични плочи, повеќеслојното непробојно стакло, како и посебните системи за заштита од експлозии и хемиски напади, овој автомобил тежи речиси четири тони.

Според порталот 24sata.hr, автомобилот што го придружувал хрватскиот премиер удрил во возилото во кое се превезувал Пленковиќ.

Share on Facebook

Tweet

Follow us

Save