Орбан ги блокира заклучоците на Советот на ЕУ за земјите-кандидатки за членство

Унгарскиот премиер Орбан ги блокира заклучоците на Советот на ЕУ за земјите-кандидатки за членство. Ова го објави претседателката на Советот за општи работи, Мари Бер, министерка за европски прашања на Данска на вчерашната прес конференција во пресрет на самитот.

Во пракса, ова значи дека оваа година Европскиот совет нема да има заклучок за рамката за проширување на Унијата.

Денешното усвојување на заклучоците на министерско ниво требаше да биде консензуален последен чекор пред конечната, стратешка и обврзувачка политичка одлука на состанокот на Европскиот совет (шефовите на влади на земјите-членки), кој ќе се одржи на 18 и 19 декември.

„Унгарија го блокира донесувањето заклучоци. Наместо тоа, ние ќе ги трансформираме нацрт-заклучоците на Советот во заклучоци на Претседателството (на Данска) со поддршка на 26 земји-членки“, објасни Бер.

Во последните месеци, Унгарија се спротивставува на европската интеграција на Украина. Неколку земји изразија загриженост дека денешната одлука во Будимпешта испраќа погрешен сигнал до кандидатите.

„Сакаме тие да ја изберат ЕУ, а не Русија“, рече Бер, изразувајќи жалење бидејќи некои од кандидатите постигнаа значителен напредок.

Сепак, Брисел формира работна група за подготовка на нацрт-договорот за пристапување на Црна Гора и ќе ги преземе потребните чекори за интеграција на Украина и Молдавија.

Инаку, во однос на Северна Македонија, Советот забележува дека државата сè уште не ги усвоила уставните измени на кои се обврзала, потсетувајќи на заклучоците од јули 2022 година.

„Советот ја потврдува својата подготвеност да свика нова меѓувладина конференција, без понатамошни одложувања или нови политички одлуки, штом Северна Македонија ја исполни оваа обврска во согласност со своите внатрешни процедури“, се наведува во документот.

Во нацрт-заклучоците се забележува дека Советот е подготвен да го отвори првиот преговарачки кластер што е можно поскоро, во согласност со Преговорната рамка. Добрососедските односи и регионалната соработка остануваат суштински елементи и на процесот на проширување и на Процесот за стабилизација и асоцијација.

„Советот ја нагласува важноста од постигнување опипливи резултати и спроведување со добра волја на билатералните договори, вклучувајќи го Преспанскиот договор со Грција и Договорот за пријателство, добрососедство и соработка со Бугарија, во согласност со Преговорната рамка. Советот, исто така, го поздравува неодамнешниот напредок постигнат во железничката врска по стратешки важниот транспортен коридор број 8 и со нетрпение очекува ефикасно спроведување на преземените обврски. Советот, исто така, ја повикува Северна Македонија да ги засили своите напори и да спроведе реформи, особено во областа на владеењето на правото, каде што не е пријавен никаков напредок во текот на изминатата година“, се вели во нацрт-документот, блокиран од Унгарија.

„Северна Македонија треба да ја обезбеди независноста и интегритетот на судството, вклучително и преку зајакнување на Судскиот совет во согласност со препораките од експертската мисија за проценка од 2023 година и мислењето на Венецијанската комисија. Борбата против корупцијата и организираниот криминал треба да се зајакне. Северна Македонија треба да ги подобри своите резултати преку ефикасни истраги, гонења, конечни пресуди и конфискација на криминален имот во случаи на корупција на високо ниво“, се наведува во нацрт-заклучоците на Советот за општи работи.

Share on Facebook

Tweet

Follow us

Save