INFOMAX.MK

Македонскиот министер за надворешни работи, Бујар Османи, денеска се обрати пред Комитетот на министри на Советот на Европа (СЕ) во Стразбур и посочи дека ОБСЕ работи на спроведување на патоказ кој ќе придонесе за постепено решавање на проблемите и конфликтите во регионот, со цел за да се обезбеди долгорочна стабилност и мир.

Османи пред министрите на Советот на Европа ги презентираше досегашните активности како претседавач и ги издвои посетите на Украина, Молдавија, Јужен Кавказ, како и Србија и Косово, при што го истакна продолжувањето на работата на ОБСЕ во тие региони.

„Живееме во период на демократски пад и безбедносни предизвици поради руската воена агресија против Украина, која ги прекрши принципите на кои се засноваат нашите организации. Затоа приоритет на нашето претседателство е да обезбедиме суштинска поддршка на Украина и нејзината Кога ќе се врати мирот и кога Русија ќе ги повлече силите од суверената територија на Украина, ОБСЕ ќе ги стави на располагање сите свои капацитети за нејзино повоено закрепнување“, рече Османи, а соопштуваат од ОБСЕ.

Османи се осврна и на долгорочните конфликти и нестабилноста во регионот на ОБСЕ, за кои како претседавач презентираше патокази за постепено решение кое ќе доведе до долгорочна стабилност и мир.

Како што рече Османи, ОБСЕ е вклучена во широк спектар важни области за луѓето, а своите капацитети за регионот на Југоисточна Европа ги насочи кон помирување, борба против корупцијата и климатските промени.

И покрај предизвиците со кои се соочува Организацијата, таа ќе остане целосно посветена на своите приоритети, рече Османи.

Овие приоритети ги комбинираат активностите на ОБСЕ и Советот на Европа, чија заедничка работа е понеопходна и релевантна од кога било, рече Османи.

Со текот на годините, двете организации негуваа силна соработка во градењето живи и силни демократии.