INFOMAX.MK

Јужноафриканската Република денеска им додели дипломатски имунитет на учесниците на претстојниот самит на БРИКС на крајот на август, за кој шефот на Кремљ, Владимир Путин, доби лична покана во март, пренесоа агенциите.

Меѓународниот кривичен суд во Хаг оваа пролет издаде налог за апсење на Путин, поради наводно нелегално депортирање на деца од Украина. Според судот, Јужноафриканската Република е должна да го приведе Путин и да му го предаде на Хаг. Поради ваквата ситуација, официјална Преторија со недели ги одмерува своите дипломатски опции.

Јужноафриканскиот оддел за меѓународни односи и соработкa денеска објави декларација по тој повод со која се признаваат два состаноци кои ќе бидат опфатени со дипломатски имунитет според Законот за дипломатски имунитети и привилегии. Првиот состанок е Министерскиот состанок на БРИКС што ќе се одржи во Кејптаун на 1 и 2 јуни 2023 година.

Имунитетите и привилегиите според Конвенцијата на ОН даваат имунитет од лично апсење или притвор. Сепак, според Римската повелба – на која се заснова работата на Меѓународниот кривичен суд во Хаг – имунитети не се доделуваат.