Русија постави нов услов за крај на војната: Москва бара заштита на рускиот јазик во Украина

Русија повторно постави нов услов за евентуален крај на војната во Украина, нагласувајќи дека заштитата на рускојазичните граѓани мора да биде дел од секој идeн мировен договор. Рускиот министер за надворешни работи Сергеј Лавров изјави дека „целосната обнова на правата на говорниците на руски јазик“ во Украина е еден од клучните предуслови за долгорочно решение на конфликтот.

Московските власти со години тврдат дека рускојазичното население во Украина е дискриминирано, што Кремљ го користи како едно од оправдувањата за инвазијата започната во 2022 година.

Лавров нагласи дека Русија ќе продолжи да се спротивставува на, како што ги нарече, сите форми на „русофобија и јазична дискриминација“, додавајќи дека заштитата на рускојазичните граѓани останува државен приоритет. Според Москва, решавањето на ова прашање е „неопходен услов“ за какво било трајно политичко решение на војната.

Изјавите доаѓаат во период кога мировните преговори меѓу Киев и Москва се во застој, а директен состанок меѓу украинскиот претседател Володимир Зеленски и рускиот претседател Владимир Путин сè уште не е реализиран. Кремљ повторно ја одби иницијативата за директни разговори, тврдејќи дека досегашните контакти не донеле конкретен напредок.

Во меѓувреме, според „Financial Times“, порака од Зеленски до Путин била пренесена преку рускиот милијардер Роман Абрамович, кој и претходно учествувал во посреднички напори меѓу двете страни. Абрамович бил вклучен и во преговорите за извоз на украинско жито преку Црното Море во 2022 година, како и во размена на заробеници.

Украина продолжува да повикува на директни преговори и привремено примирје за време на разговорите, додека Русија смета дека претходните обиди за дијалог не дале резултати. И покрај дипломатските пораки, двете страни остануваат со длабоко различни позиции, без јасен знак за скорешен напредок кон мировен договор.

Share on Facebook

Tweet

Follow us

Save