Руското обвинителство бара Фејсбук и Инстаграм да бидат прогласени за екстремисти

Руското државно обвинителство побара од судот да ја прогласи компанијата „Мета“, во чии рамки функционираат социјалните мрежи Фејсбук и Инстаграм, за екстремистичка и во исто време да ја забрани нејзината активност во Русија.

Како што се наведува, активностите на компанијата „Мета“ може да се оквалификуваат како јавен повик за екстремизам и промоција на тероризам.

Руското државно обвинителство испрати и барање до Државната агенција за надзор на комуникациите „Роскомнадзор“ за ограничување на пристапот до социјалната мрежа Инстаграм.

Сепак, овие мерки нема да важат за „Ватсап“, бидејќи станува збор за месинџер, а не за социјална мрежа, наведува неименуван извор за руските медиуми.

Москва очекува официјална реакција од компанијата „Мета“ за повиците за насилство врз граѓаните на Руската Федерација, изјави официјалниот претставник на руското Министерство за надворешни работи, Марија Захарова.

„Западните медиуми пишуваат дека поради ситуацијата во Украина, компанијата „Мета“ им овозможила на корисниците на Фејсбук и Инстаграм да повикуваат на насилство врз руските граѓани во некои земји. Очекуваме официјална реакција од компанијата. Дополнително, сакаме одговор и, ако навистина имало упатство од тој тип, кој го иницирал и одобрил?“, напиша Захарова на Телеграма.

Share on Facebook

Tweet

Follow us

Save