Се чека на ЕУ за итни мерки, во меѓувреме масовно се откажуваат летови

Европската Унија неделава треба да објави насоки за авиокомпаниите во обид да се намали притисокот од кризата со авионското гориво, додека авиоиндустријата веќе масовно ги кратат распоредите пред летната сезона. Во мај на глобално ниво се откажани околу 13.000 летови, со што од продажба се повлечени приближно два милиони седишта.

Кризата не значи дека авионите остануваат без гориво преку ноќ, туку дека растот на цените и неизвесноста во снабдувањето ги тераат компаниите да ги намалуваат понудените капацитети, особено на пократки и помалку профитабилни линии. Дел од анализите укажуваат дека 13.000 откажани летови звучат драматично, но претставуваат околу 1,5 проценти од глобалниот капацитет за мај. Сепак, проблемот доаѓа во најчувствителниот период — пред летните одмори и сезоната на најголем притисок врз аеродромите.

Брисел најавува дека насоките ќе се однесуваат на правилата за снабдување со гориво, правата на патниците, логистиката за точење и можноста за користење алтернативни типови авионско гориво. Европската комисија бара авиокомпаниите и земјите членки да бидат подготвени за повеќе сценарија, бидејќи кризата останува неизвесна и може да се продлабочи доколку продолжат нарушувањата на енергетските пазари.

Најпогодени се дел од големите европски и меѓународни превозници, меѓу кои се споменуваат „Луфтханза“, „Туркиш ерлајнс“, „Бритиш ервејс“ и „КЛМ“. Дел од компаниите веќе ги кратат кратките линии, други ги намалуваат фреквенциите, а некои најавуваат поскапи билети за подолги дестинации.

За патниците тоа значи дека летната сезона може да донесе повеќе промени во распоредите, откажувања, пренасочувања и поскапи нови резервации. Најризични се патувањата со кратки преседнувања, летовите кон помали аеродроми и линиите што зависат од авиокомпании со тесни маржи. Патниците чии летови ќе бидат откажани во рамки на ЕУ и понатаму имаат право на враќање на парите или пренасочување, но прашањето за дополнителна компензација ќе зависи од конкретните околности и од тоа како кризата ќе биде квалификувана од регулаторите.

Европската комисија сега се обидува да спречи хаотична реакција од авиокомпаниите, затоа што едностраното кратење линии може брзо да се претвори во синџир на проблеми: помалку седишта, повисоки цени, преполни алтернативни летови и поголем притисок врз туристичките агенции. Ако насоките дојдат пред летниот пик, тие треба да дадат појасни правила за тоа што смеат да прават авиокомпаниите и што им следува на патниците кога летот ќе биде откажан.

Share on Facebook

Tweet

Follow us

Save