Словенечкиот премиер: Европа конечно го покажа својот ‘рбет

Словенечкиот премиер Роберт Голоб ги повика европските лидери на единство и солидарност во време кога, како што рече, пред Европа се отвора перспектива за нов светски поредок, оддалечувајќи се од нормите што важат со децении.

Во разговор за Си-Ен-Ен, Голоб изрази разбирање за ставовите и фрустрациите на украинскиот претседател Володимир Зеленски. „Ја разбирам фрустрацијата што ја изразува претседателот Зеленски доста добро. Ја знам нејзината основна причина и тоа не е ништо ново“, рече словенечкиот премиер.

Тој, исто така, позитивно зборуваше за неодамнешниот одговор на Европската Унија на заканите од американскиот претседател Доналд Трамп, кој се закани дека ќе ги зголеми царините за сојузниците од НАТО и ќе го анектира Гренланд од Данска.

„Европа е силна само кога е обединета. Во последната недела, Европа конечно го покажа својот ‘рбет“, рече Голоб, нагласувајќи дека ја поддржува одлуката на НАТО да го издржи притисокот и да се спротивстави на барањата на Трамп.

Голоб, заедно со британскиот премиер Кир Стармер и францускиот претседател Емануел Макрон, им се придружија на повеќето европски лидери кои ја одбија поканата на Трамп да учествуваат во новоформираниот Мировен совет.

Кога беше прашан за идејата на Трамп за комитетот што работи заедно со Обединетите нации, Голоб рече: „Не може да постои никаков механизам што би бил паралелен со Обединетите нации“.

Зборувајќи за иднината на НАТО, словенечкиот премиер предупреди дека, иако линијата што би значела распад на Алијансата сè уште не е премината, неодамнешните настани го доведоа НАТО „опасно блиску“ до тоа сценарио.

И покрај ова, Голоб останува оптимист.

„Ние, сојузниците, сè уште имаме време да седнеме на маса и да разговараме едни со други искрено, отворено, можеби дури и гласно. Но, потоа да најдеме заеднички пат напред“, заклучи тој.

Share on Facebook

Tweet

Follow us

Save