Трамп го поканил Путин да се придружи во „Одборот за мир“

Кремљ објави дека Владимир Путин е поканет да се придружи на „одборот за мир“ на Доналд Трамп, формиран минатата недела со намера да го надгледува прекинот на огнот во Газа.

Портпаролот на Кремљ, Дмитриј Песков, во понеделник им изјави на новинарите дека Русија се обидува да ги „разјасни сите нијанси“ на понудата со Вашингтон, пред да го даде својот одговор.

Тврдењето за покана доаѓа откако Путин не покажува знаци дека ќе ја прекине својата инвазија на Украина, во која стотици илјади луѓе се убиени, а руските војници извршија злосторства против цивилите. Рускиот претседател постојано ги отфрла предлозите за прекин на огнот по сегашните линии на фронтот.

Кремљ, исто така, во понеделник соопшти дека специјалниот претставник на Путин, Кирил Дмитриев, ќе присуствува на Светскиот економски форум во Давос оваа недела и ќе се сретне со членовите на американската делегација таму. Не е јасно дали тие состаноци ќе вклучуваат дискусии на одборот за Газа.

Поканата до Путин, која сè уште не е потврдена од Вашингтон, покренува повеќе прашања за предвидената агенда за одборот. Првично беше дел од предлозите на Трамп за прекин на огнот за војната во Газа и требаше да го надгледува преминот кон траен мир на територијата и да ја надгледува работата на комитет од палестински експерти, исто така објавен минатата недела, кои ќе се грижат за секојдневното управување со Газа. Нејасно опишаната шема беше одобрена во резолуција на Советот за безбедност на ОН во ноември.

Првите назначувања во одборот, објавени во петок, го вклучуваа самиот Трамп како претседател, со „основачки извршен одбор“ во кој се вклучени поранешниот британски премиер Тони Блер и сегашниот државен секретар на САД, Марко Рубио. Исто така беа назначени и претставникот на Трамп за решавање проблеми, инвеститорот во недвижности Стив Виткоф, зетот на претседателот Џаред Кушнер и претседателот на Светската банка, Аџај Банга. Бугарскиот дипломат Никалај Младенов ќе го води одборот.

Во текот на викендот се дозна дека Трамп испратил покани и до лидерите на држави, вклучувајќи ги Аргентина, Парагвај, Турција, Египет, Канада и Тајланд, па и Албанија. Белорусија објави дека нејзиниот лидер, Александар Лукашенко, е поканет и дека ја поздравува поканата.

Британскиот премиер, Кир Стармер, наводно минатата недела добил понуда за членство, иако чекал формална покана.

Секој национален лидер би служел максимум три години во одборот, освен ако нивните влади не платат членарина од 1 милијарда долари за да станат постојан член, што е ехо на елитната структура на членство на Трамп за неговиот имот Мар-а-Лаго и неговите голф терени. Не е јасно кој би бил примател на таквите плаќања за членство и како би се користеле.

Се додава дека одборот треба да има „храброст да се оддалечи од пристапи и институции кои премногу често не успевале“, што е веројатен удар кон ОН.

Новинските агенции во понеделникот цитираа француски претставници кои изјавија дека Франција ќе ја одбие понудата за членство, поради пошироките аспирации на одборот.

Француската новинска агенција АФП, исто така, цитираше канадски функционер кој рече дека земјата нема да плати за членство, ниту пак е побарано плаќање, но не е јасно дали Отава исто така ќе ја отфрли поканата целосно.

Песков, портпаролот на Кремљ, во меѓувреме, сугерираше дека преземањето на Гренланд од страна на САД би го зацврстило местото на Трамп во книгите по историја.

„Тука, можеби, е можно да се апстрахира од тоа дали ова е добро или лошо, дали ќе биде во согласност со параметрите на меѓународното право или не“, рече Песков, но додаде дека тоа „сигурно ќе влезе во историјата“.

Share on Facebook

Tweet

Follow us

Save