Трамп тврди: Нетанјаху нема да има друг избор, јас одлучувам за сè

Претседателот на САД, Доналд Трамп, изјави дека израелскиот премиер Бенјамин Нетанјаху нема да има друг избор освен да го прифати договорот што САД го преговараат со Иран, бидејќи претседателот на САД е тој што одлучува.

„Јас одлучувам. Јас одлучувам за сè. Тој не донесува одлуки“, рече Трамп.

Трамп зборуваше кратко откако Иран лансираше бараж од балистички ракети кон Израел, што е најсериозно кршење на прекинот на огнот постигнат на почетокот на април.

Претседателот на САД претходно изјави дека ќе му нареди на Нетанјаху да се воздржи од одмазда против Иран, став што е спротивен на изјавите на израелската војска.
Трамп рече дека иранските напади не ја промениле неговата желба да ги заврши преговорите меѓу САД и Иран.

„Тоа нема да има никакво влијание врз договорот“, изјави тој за „Фајненшл тајмс“.

„Ќе видиме како ќе се одвива сето тоа. Ова беа напади кои воопшто не ја погодија целта. Тоа е едно од оние нешта што се случуваат веќе 3.000 години, или 47 години, во зависност од тоа како сметате“, додаде тој.

Но, за разлика од неговиот став од почетокот на април, кога потпретседателот на САД Џ.Д. Венс ги водеше првите разговори со Иран, Трамп овој пат не звучеше толку уверен дека договорот со Иран е на дофат.

Тој нагласи дека иранскиот напад во недела нема да влијае на неговата проценка на ситуацијата.

„Договор може да има, или не мора да биде постигнат, во зависност од неговите предности, но ова нема да има никакво влијание“, рече тој.

На прашањето што ќе се случи ако таков договор не успее „врз основа на неговите предности“, Трамп рече дека би размислил за операција на командоси против Иран.

„Тоа значи едно од две работи. Прво, може да значи дека можеби ќе одиме таму и ќе ја завршиме работата во областите што не сме ги решиле воено. Или едноставно може да значи дека ќе продолжиме да го блокираме Иран, бидејќи таа блокада веројатно беше помоќна од кој било напад што некогаш бил започнат против таа земја“, одговори тој.

Коментарите на Трамп за Нетанјаху дојдоа откако „Аксиос“ минатата недела објави протечени детали од многу жесток разговор меѓу двајцата лидери.

Како што го опиша еден американски функционер, Трамп му рече на Нетанјаху: „Луд си. Ќе беше во затвор да не бев јас. Сега сите те мразат. Сите го мразат Израел поради ова.“

Трамп потврди за „Фајненшел тајмс“ дека разговорот се одржал и не го оспори начинот на кој беше претставен.

И покрај неколкуте прекини на огнот меѓу Израел и Либан, посредувани од САД, вклучувајќи го и оној што стапи на сила минатата недела, Трамп не успеа да го спречи Израел да извршува речиси секојдневни напади врз цели во Либан, вклучувајќи го и нападот претходно во неделата врз упориштето на Хезболах во Бејрут.

Иранските напади беа одговор на тој удар. Иран изјави дека трајното примирје од страна на Израел е предуслов за каков било договор меѓу САД и Иран, пренесе „Бета“.

Share on Facebook

Tweet

Follow us

Save