Унгарците го отфрлаат барањето на Трамп, нема да се откажат од руски извори на нафта и гас

Унгарија нема да се откаже од руската енергија, изјави нејзиниот министер за надворешни работи Петер Сијарто за „Гардијан“, и покрај барањето на Белата куќа до сојузниците во НАТО да престанат да купуваат руска нафта.

Министерот за надворешни работи на Унгарија вели дека снабдувањето со енергија преку други средства е „убав сон“ и ги опишува западноевропските претставници како „фанатици“.

Доналд Трамп побара од Европа да престане да увезува руска нафта, но во интервју на маргините на 80-тото заседание на Генералното собрание на ОН, Петер Сијарто рече: „Не можеме да обезбедиме стабилно снабдување со енергија за нашата земја без руски извори на нафта и гас“. Тој додаде дека „ја разбира“ позицијата на Трамп, објави „Гардијан“.

„За нас, снабдувањето со енергија е чисто физичко прашање“, рече тој. „Можеби е убаво да се сонува за купување нафта и гас некаде на друго место, но можеме да купуваме само таму каде што имаме инфраструктура. И кога ќе ја погледнете вистинската инфраструктура, јасно е дека без руски резерви, невозможно е да се обезбеди безбедноста на снабдувањето на нашата земја.“

Share on Facebook

Tweet

Follow us

Save