Флорида изврши две смртни казни, првпат по повеќе од 60 години

Американската сојузна држава Флорида изврши две смртни казни, првпат во оваа држава по 1964 година, објавија американските медиуми.

Еден од егзекутираните, Доминик Окиконе (Dominick Occhicone), имал 80 години и бил најстарото лице погубено во Флорида откако смртната казна повторно била воведена во 1970-тите. Според пресудата за смртна казна донесена во 1987 година, Окиконе ги застрелал родителите на својата поранешна девојка.

Вториот погубен бил 68-годишниот Џејмс Дакет (James Duckett). Тој бил прогласен за виновен во 1988 година за силување и убиство на 11-годишната Тереза Мекеби. Дакет ја обжалил смртната казна. Според независниот Информативен центар за смртната казна, ДНК-анализата на доказите од местото на злосторството покажала дека не можат да се донесат сигурни заклучоци.

Егзекуциите биле извршени со смртоносна инјекција во затворот во Старк, Флорида.

Егзекуцијата на Окиконе повторно ја разгоре дебатата за возраста на која може да се изврши смртна казна. Весникот „USA Today“ објави делови од писмо на адвокатите на Окиконе, во кое се наведува дека осуденикот имал проблеми со слухот и видот и дека можел да се качува по скали само со помош на затворските службеници.

Сепак, властите на Флорида останале на ставот дека извршувањето на смртните казни има одвраќачки ефект.

Најстарото лице погубено во САД во поново време бил 83-годишниот Волтер Муди, кој бил егзекутиран во 2018 година.

Во моментов, ниту една американска сојузна држава не извршува толку многу смртни казни како Флорида, со која управуваат републиканците. Во 2025 година, во САД биле погубени 47 лица, од кои 19 во Флорида.

Share on Facebook

Tweet

Follow us

Save