Фон дер Лајен предложи нов пакет санкции против Русија

Во вторник, Европската комисија (ЕК) го предложи 18-тиот пакет санкции против Русија, кој е главно насочен кон руските приходи од продажба на енергија и банкарскиот сектор.

„Предлагаме 18-ти пакет строги санкции, со кои во основа ги таргетираме два сектора, рускиот енергетски сектор и банкарскиот сектор. Ги прошируваме забраните за извоз и ги зајакнуваме мерките против заобиколување на санкциите“, изјави претседателката на ЕК, Урсула фон дер Лајен.

За прв пат, извршното тело на ЕУ предлага забрана за трансакции со гасоводите „Северен тек 1“ и „Северен тек 2“, како и намалување на највисоката цена по која може да се продава руска нафта од 60 на 45 долари за барел.

Намалувањето на максималната цена за продажба на руска нафта е мерка усвоена од групата Г7, која ќе разговара за тоа на самитот оваа недела во Канада.

Новиот пакет санкции вклучува дополнителни 77 бродови кои се дел од таканаречените руски флоти во сенка, бродови кои пловат под знамиња на трети земји, а Русија ги користи за да ги заобиколи санкциите. На листата веќе има 342 брода.

Фон дер Лајен изјави дека на почетокот на војната, руските приходи од извоз на енергија во Европа изнесувале 12 милијарди евра месечно, а благодарение на претходните санкции, тие паднале на 1,8 милијарди евра.

„Сè уште е премногу“, рече таа, додавајќи дека една третина од приходите на Русија доаѓаат од продажба на нафта.

Во банкарскиот сектор, ЕК ја проширува забраната за пристап до SWIFT, системот за размена на комуникации меѓу банките, на целосна забрана за трансакции.

Се предлага забрана за извоз во Русија во вредност од повеќе од 2,5 милијарди евра, што би го оневозможило пристапот на руската економија до критични технологии и индустриски стоки, вклучувајќи машини, метал, пластика и хемикалии.

Исто така, се ограничува извозот на стоки и технологии со двојна намена што се користат за производство на беспилотни летала, ракети и други системи за оружје.

22 руски и странски компании кои обезбедуваат директна или индиректна поддршка на рускиот воен и индустриски комплекс се исто така под влијание на санкциите.

Земјите-членки, кои треба едногласно да го одобрат овој пакет санкции, ќе започнат со дебата за предлогот оваа недела.

Share on Facebook

Tweet

Follow us

Save