Францускиот парламент усвои закон за евтаназија

Францускиот парламент усвои закон со кој се легализира евтаназијата за терминално болни пациенти, а премиерот Себастијан Лекорну најави жалба до Уставниот суд за да се обезбеди примена на законот во согласност со уставните принципи и човековото достоинство, пренесува Политико.

„Пациентите над 18 години, кои страдаат од сериозни и неизлечиви болести, кои се опасни по живот или се во терминална фаза, ќе имаат право на асистирано умирање, но само ако болеста им донесе „неподносливо страдање“ и ако се свесни дека ја донесуваат одлуката слободно и со целосна свест“, се наведува во законот.

Со усвојувањето на законот, Франција се приклучува на растечкиот број европски земји, вклучувајќи ги Шпанија, Белгија и Холандија, кои легализираа различни форми на евтаназија.

Француското собрание го поддржа законот со 291 глас „за“ и 241 „против“ во четвртиот обид, бидејќи претходните обиди завршија со отфрлање во Сенатот.

Сега владата ја искористи одредбата во Уставот што дозволува усвојување во Долниот дом, без одлука од Сенатот, објавува Франс 24.

Францускиот претседател Емануел Макрон вети закон за асистирано умирање кога беше реизбран за втор мандат во 2022 година, а неговото усвојување беше една од најважните социјални реформи откако Франција дозволи истополови бракови во 2013 година. По гласањето, тој ја поздрави „почитуваната дебата“ на пратениците за ова прашање.

Share on Facebook

Tweet

Follow us

Save