INFOMAX.MK

Во Хрватска започна приведувањето на професионални возачи, проследено со шестмесечна забрана за влез во Шенген за возачи со пасоши од БиХ, објави Конзорциумот „Логистика на БиХ“.

„Иако формално не станува збор за лишување од слобода, фактот дека возачите се приведени и дека им се наметнати забрани за влез претставува алармантен сигнал за целиот транспортен сектор на Босна и Херцеговина“, се наведува во соопштението.

Патем, Пленумот на Конзорциумот „Логистика БиХ“ на вонредна седница потврди дека 23 март останува датум на протестни активности бидејќи транспортниот сектор на БиХ е една од клучните економски гранки, чија вредност се проценува на неколку милијарди евра годишно. Примената на правилото за 90/180 дена престој во Шенген-зоната, како и воведувањето на системот за влез-излез, веќе доведуваат до сериозни нарушувања во меѓународниот транспорт. Така, повеќе од 300 професионални возачи беа вратени од границата за неколку недели, што директно влијае на реализацијата на извозот на стоки и функционирањето на синџирите на снабдување.

„Доколку овој тренд продолжи, последиците за транспортниот сектор на БиХ ќе бидат драматични. Проценките од секторот покажуваат дека во првата фаза, голем број транспортни компании би можеле да бидат затворени, би згаснале до 20.000 работни места, извозниот и логистичкиот систем на државата ќе бидат сериозно загрозени“, нагласува „Конзорциумот на БиХ“.

Тие објаснија дека транспортните компании во Босна и Херцеговина се најранливи на ограничувањата за работата на возачите во меѓународниот транспорт во целиот регион. Како што наведоа, ако професионален возач може да работи само 15 дена во месецот во меѓународниот транспорт, деловниот модел на повеќето транспортни компании станува неодржлив и во таква ситуација, транспортот нема да исчезне, туку ќе биде заменет со странски превозници, но по значително повисоки цени.

Во соопштението се додава дека проценките од секторот покажуваат дека цената на транспортот со странски превозници ќе биде повисока за 1.000 до 1.500 евра по транспортна операција, што на крајот ќе го платат домашната економија и граѓаните на БиХ.

„Наместо силен институционален одговор, сведоци сме на одложување на решавањето на проблемите преку работни групи, отсуство на политичко лобирање кон институциите на ЕУ и недостаток на координација со соседните земји“, се вели во соопштението.

Тие предупредуваат дека ова повеќе не е само проблем за возачите и транспортните компании, туку е и прашање на економскиот опстанок на логистичкиот систем на Босна и Херцеговина.

„Доколку итно не се започне со сериозен политички дијалог со институциите на ЕУ и соседните земји, последиците ќе ги почувствува целата економија на БиХ“, заклучуваат тие.