Швајцарската полиција уапси еден од сопствениците на барот во Кран-Монтана

Швајцарската полиција уапси еден од сопствениците на барот во Кран-Монтана, каде што во пожарот во новогодишната ноќ загинаа 40 луѓе, од кои повеќето под 20 години. Медиумите објавија дека Жак Морети е притворен поради ризик од бегство.

Во пожарот во барот „Ла Констеласион“ беа повредени 116 луѓе. Оваа недела се откри дека пет години не биле направени безбедносните проверки во барот.

Против Жак Морети и неговата сопруга Џесика, кои заедно го водеа барот, е покрената кривична истрага. Тие се осомничени за убиство од небрежност, предизвикување телесни повреди од небрежност и за палеж од небрежност, соопшти обвинителството на кантонот Вале. Се верува дека една од најголемите трагедии во историјата на Швајцарија била предизвикана од прскалките поставени на шишиња шампањ кога премногу биле приближени до плафонот, при што се запалила пената за звучна изолација.

Меѓу жртвите на пожарот имаше државјани на Швајцарија, Италија, Романија, Турција, Франција и Србија.

Share on Facebook

Tweet

Follow us

Save