Американската прва дама за Денот на мајката ќе ги посети украинските бегалци во Романија и Словачка

Првата дама на САД Џил Бајден планира да го напушти Вашингтон и да замине на посета во Романија и Словачка за да ја истакне американската посветеност кон украинските бегалци за време на викендот, кога се прославува Денот на мајката, пренесува Ројтерс.

Сопругата на претседателот Џо Бајден треба да се сретне со припадниците на американската војска и персоналот на амбасадата, раселените родители и деца од Украина, работниците на хуманитарна помош и наставниците за време на четиридневното патување, соопшти нејзината канцеларија.

Бајден, која предава англиски и пишување на колеџот во Вирџинија, ќе се сретне и со првата дама на Романија, Кармен Јоханис, професорка по англиски јазик, како и со претседателката на Словачка Зузана Чапутова.

Во недела, на денот кога во САД се слави како Ден на мајката, Бајден ќе се сретне со мајки и деца од Украина кои биле принудени да ги напуштат своите домови поради војната на Русија против Украина, соопшти нејзиниот кабинет.

Сопругите на американските претседатели имаат мала моќ за креирање политики, но често имаат улога на „мека моќ“, пренесувајќи ја пораката на администрацијата до гласачите и во странство.

Американскиот државен секретар Ентони Блинкен, секретарот за одбрана Лојд Остин и претседателката на Претставничкиот дом Ненси Пелоси сите го посетија украинскиот претседател Володимир Зеленски во Киев. Претседателот Бајден ја посети Полска во март.

Повеќе од 840.000 Украинци избегаа во Романија, а околу 80.000 останаа таму. Државната телевизија од петок ќе емитува неделни часови по романски јазик за деца, иако само 2.000 украински деца се запишани во романските училишта.

Нешто повеќе од 380.000 Украинци влегле во Словачка од почетокот на војната, но повеќето отпатувале понатаму во другите европски земји. Земјата е силен поддржувач на Украина, испорачува помош и оружје, вклучувајќи ја и нејзината единствена батерија на системот за воздушна одбрана С-300 од советската ера.

Меѓу оние што ќе ја придружуваат Бајден се помошникот државен секретар за европски и евроазиски прашања Карен Донфрид, вишиот директор за мултилатерални прашања во Националниот совет за безбедност Кертис Рид и директорот за хуманитарни прашања во Националниот совет за безбедност Даниел Дикхаус.

Share on Facebook

Tweet

Follow us

Save