Бајден: Беше животна привилегија да ѝ служам на нашата нација

„Ги дадов срцето и душата на нашата нација. И јас бев благословен милион пати во замена за љубовта и поддршката на американскиот народ“ рече американскиот претседател во заминување, Џо Бајден во писмото објавено од Белата куќа.

Бајден (82) в понеделник ќе му ги предаде овластувањата на новоизбраниот американски претседател Доналд Трамп, кој победи на претседателските избори во ноември минатата година.

Бајден, ветеран демократ, не само што ќе ја напушти Белата куќа по четири години на чело на најмоќната демократија во светот, туку и ќе ја заврши својата политичка кариера.

„Беше животна привилегија да и служам на оваа нација повеќе од 50 години. Никаде на друго место на Земјата дете со скромно потекло од Скрентон, Пенсилванија и Клејмонт, Делавер, кое пелтечеше, еден ден би седнал на маса во Овалната соба како претседател на САД“ напиша Бајден.

Белата куќа, исто така, објави долга листа на достигнувања на Бајден како претседател, вклучително и „историско закрепнување“ од пандемијата на коронавирус и „економски раст и намалување на трошоците“.

Но, многу Американци ќе го паметат и по неговото инсистирање да се кандидира за втор мандат, иако долго се поставуваше прашањето дали е способен да го стори тоа поради годините.

По катастрофалниот настап во телевизиска дебата, Бајден на крајот се повлече од трката само неколку месеци пред изборите, а демократите ја номинираа потпретседателката Камала Харис за свој претседателски кандидат.

– Историјата е во ваши раце. Моќта е во ваши раце. Идејата за Америка е во ваши раце. Треба само да ја задржиме вербата и да се потсетиме кои сме, заклучува Бајден во писмото.

Share on Facebook

Tweet

Follow us

Save