Бајден изгуби нерви: Зеленски е неблагодарен!

Додека украинскиот претседател е незадоволен од се, шефот на Белата куќа има се поголем проблем да ја оправда американската помош за Киев во домашната јавност.

За време на телефонскиот разговор Џозеф Бајден му се налути на Володимир Зеленски, верувајќи дека украинскиот претседател не го цени сето она што Америка направи за Украина и наместо тоа само бара повеќе.

Според она што неодамна го откри NBC News, шефот на Белата куќа летово ги изгубил нервите со Зеленски, сметајќи го украинскиот претседател како неблагодарен. Бајден му се јавил на Зеленски да го извести дека Америка ќе и испрати на Украина воена помош вредна милијарда долари, но соговорникот го прекинал и се пожалил дека тоа не е доволно. Додека Зеленски набројуваше што треба да испрати Вашингтон до Киев, наместо да му се заблагодари за она што веќе го доби за војната против Русија, американскиот лидер го крена гласот. За да се намали штетата и да се смири шефот на Западното крило, Зеленски по тој разговор јавно го пофали Вашингтон за помошта што му ја испраќа на Киев.

Досега Конгресот одобри околу 65 милијарди долари за администрацијата на Бајден за воена, економска и хуманитарна помош за Украина. Додека властите на Мајдан постојано бараат повеќе оружје и пари, на Бајден му е се потешко да и објасни на домашната јавност зошто троши толку многу пари за војна во далечна земја. Иако надворешнополитичката елита во Вашингтон сè уште го поддржува вооружувањето на Украина во војната против Русија, ентузијазмот за стратегијата на Бајден се намалува кај граѓаните, а донекаде и во Конгресот. Според анкетата спроведена минатиот месец од Истражувачкиот центар Пју, 38 отсто од Американците веруваат дека е важно дали Украина ќе победи во војната. Тој процент во мај беше 55 отсто.

Доколку анкетите се покажат точни, Републиканската партија ќе победи на конгресните избори следната недела. Нејзините лидери веќе посочија дека во тој случај би можеле да ја намалат воената и економската помош за Украина. Како што рече лидерот на конзервативното малцинство во Претставничкиот дом, Кевин Мекарти, Киев повеќе нема да може да смета на „бланко чек“. На оваа изјава и се придава големо значење бидејќи Мекарти ќе стане спикер на Долниот дом на Капитол доколку конзервативците навистина надвладеат. Доколку демократите ја загубат контролата над Конгресот, Белата куќа повеќе нема да може да очекува законодавната гранка да ги поддржи сите предлози на Бајден за испраќање оружје во Источна Европа.

Капитолот досега одобруваше пратки во Украина, а конгресмените кои гласаа против предлозите на владата доаѓаа од Републиканската партија. Ситуацијата сега е таква што некои либерали веројатно би гласале „против“. Најпрогресивните демократи минатиот месец побараа од Бајден да престане да ја вооружува Украина и да започне преговори со Русија. Тие 30 конгресмени посочија дека САД треба да се договорат со Москва наместо да ризикуваат нуклеарен конфликт. Писмото што левото крило на Демократската партија го испрати до претседателот ја вознемири надворешнополитичката елита, бидејќи покажа „пукнатина“ во американската стратегија кон состојбите во Источна Европа. Следеа напади врз потписниците на писмото, а се тврдеше дека конгресмените ја поддржуваат политиката на смирување кон рускиот претседател Владимир Путин и отстапувањето на украинската територија на Русија. Притисокот бил толку силен што споменатите конгресмени го повлекле писмото во рок од 24 часа.

Кога станува збор за Републиканската партија, најголеми противници на политиката на „бланко чек“ се конзервативците кои го поддржуваат поранешниот американски претседател Доналд Трамп.

„Мораме веднаш да бараме преговори за мирен крај на војната во Украина или ќе имаме трета светска војна. Ништо нема да остане на нашата планета и сето тоа поради глупавите луѓе кои немаа поим за моќта на нуклеарното (оружје)“, рече Трамп на минатомесечниот митинг.

Со него се согласува и републиканската конгресменка Марџори Тејлор Грин, која неодамна изјави дека актуелната влада во Киев постои „само затоа што Стејт департментот под (Барак) Обама помогна во соборувањето на поранешниот (украински) режим“.

Иако се очекува повеќе конзервативци како Марџори Тејлор Грин да се приклучат на новиот Конгрес, Републиканската партија не е целосно против натамошното вооружување на Украина, но во најдобар случај е поделена по ова прашање, пишува Си-Ен-Ен. Лидерот на конзервативците во Сенатот Мич Меконел најави дека неговите сопартијци во Горниот дом ќе гласаат за во иднина да се снабдува Киев со оружје. Други влијателни сенатори, како Линдзи Греам, го критикуваа делумното дистанцирање на Мекарти од Киев.

Републиканците кои се противат на намерата на Белата куќа да продолжи да и помага на Украина истакнуваат дека администрацијата на Бајден неодговорно троши пари. Според овие конзервативци, Вашингтон има поголеми проблеми, Украина не е од витален интерес за американската национална безбедност, а европските сојузници во НАТО треба да сносат поголем товар бидејќи војната се случува во нивниот двор. Бајден ги предупреди гласачите дека токму поради ваквото размислување во Републиканската партија, следната недела треба да гласаат за демократите.