Без коментар, 3aeв го доби нajвисокото признание од Сојузот на бopците

Премиерот Заев прими највисоко признание – Повелба на Сојузот на борците за долгогодишна посветеност и соработка: Вашата борба резултираше со државност, чест ми е да го продолжувам вашето дело, кое за мене е аманет, борбата против фашизмот никогаш да не запре.

Претседателот на Владата на Република Северна Македонија Зоран Заев вчера на покана на Сојузот на борците (СБМ) во Клубот на пратеници прими Повелба на Сојузот на Борците, за долгогодишен и успешен придонес во поддршката и соработката со Главниот одбор на Сојузот, и негово издигнување на достоинствено државно ниво.

Премиерот Заев истакнувајќи дека е особено горд и благодарен што еден од неговите последни јавни настапи како Претседател на Владата е средбата со претставниците на Сојузот на борците, како член и продолжувач на традициите на слободарското антифашистичко движење и нивното наследство, подвлече дека останува неговата свечена обврска за понатамшна афирмација на големото, историско дело на храбрите борци на НОБ.

„Гордоста е голема, но честа и денеска да бидам со вас е уште поголема. Уште повеќе, кога во година кога го одбележуваме значајниот јубилеј 80 – години од Народното востание и секако 73 години од основањето на Сојузот на борците и сето тоа во рамките на 30- годишнината од независноста на нашата држава. Во бурни времиња на светската историска сцена вие презедовте историска улога. Препознавте дека пред вас е момент, кој не смее да биде пропуштен. Кренавте антифашистичко востание и ја поведовте Националната ослободителна борба, од која се роди и нашата држава. Држава, што на нејзината цел ја доведоа мажите и жените, припадниците на партизанските одреди на Народното антифашистичко ослободително движење“, истакна премиерот Заев во своето обраќање на средбата со претставниците на СБМ.

Упатувајќи искрена благодарност, за подвигот и остварувањето на непроценливото дело, односно македонската државност на генерацијата која го оствари вековниот стремеж и сон на многу претходни генерации, Заев на борците и борките и подржувачите на нивното дело, им порача:

„Како премиер, секогаш настојував овие наши средби да не бидат само формалност и протокол. Јас не можам да дозволам вашето дело, наследството кое што ни го оставивте да бидат одбележувани само како формалност. Секоја средба со вас мене ме инспирираше да си поставувам прашања: Како да го зачуваме она што го наследивме и како од Северна Македонија да направиме подобра држава, поубаво место за живеење? Како да направиме чекор повеќе во освојувањето на слободата за сите наши граѓани? Такви прашања и насоки инспирира вашето дело“, рече премиерот Заев додавајќи дека како резултат од подвигот на борците од НОБ, ја имаме Република Северна Македонија, меѓународно призната држава со сите постулати на државност, членка на Обединетите нации, членка на НАТО пред чие седиште во Брисел се виори македонското знаме и никој веќе не може да го оспори македонскиот јазик и македонскиот идентитет како посебност, автентична за овој народ и за оваа држава.

„Да завршам со голема благодарност. Нѐ задолживте со голем дар, голема чест. Вашето дело заслужува длабок поклон и чест ми е да го продолжувам вашето дело кое за мене е аманет борбата против фашизмот и за праведно општество никогаш да не запре. Ви благодарам на сите за честа што ми ја укажавте со ова признание“, истакна Заев додавајќи дека тој и двете Влади што ги предводеше, останаа посветени на поддршката на Сојузот на борците во негувањето на традициите и на светлите датуми од Народноослободителната борба за зачувување и чествување на остварувањата од кои се роди македонската државност.

„Вашите заложби и почит кон нас борците и нивните продолжувачи нѐ направија повторно горди, нѝ го вратија достоинството, коe сакаше некој да го уништи, но како резултат на взаемните заложби тоа не успеа“, истакна претседателот на Главниот одбор на Сојузот на Борците од НОАВМ 1941-1945 и граѓаните поддржувачи, д-р Никола Стојановски врачувајќи му ја Повелбата за повеќегодишната посветеност, поддршка и соработка со Сојузот на борците, посакувајќи да продолжи соработката меѓу Владата и Главниот одбор за успех на СБМ и просперитет на Република Северна Македонија.

Потпретседателот на Главниот одбор, Борко Зафировски посебно го нагласи вниманието и посветената отвореност, промоција и соработка со премиерот Заев и соработниците од неговиот Кабинет.

„За јавноста која сака да забележи и запомни, ќе ги наведеме, освен трајното покровителство и грижата, така и големите настани: Покровителство и заедничко одбележување на 70 години од СБМ, 75 години од АСНОМ, Свечената седница на Владата и Главниот одбор на 9 Мај во присуство на пратеничките групи и Дипломатскиот кор, или годинава 80-годишнината од Народното востание и Меѓународната средба, прва по повеќе од 3 децении, а на тема Антифашизмот денес“, подвлече Зафировски истакнувајќи задоволство од вниманието кое на делегацијата на Главниот одбор ѝ е посветено за одбележувања на сите историски датуми.

На средбата и свечен настан, беше истакнато дека со доделувањето на Повелбата за долгогодишен и успешен придонес на премиерот Заев за неговите лични заложби за време на неговиот мандат ќе заживее традиција, која ќе биде елан за продолжување и јакнење на продолжување на работата на претставниците на Сојузот на борци и во новото модерно и современо општество.

Share on Facebook

Tweet

Follow us

Save